Гӏалгӏайчен кулгалхочо цар Денца даькъалабийцар лакхарча ишкола хьехархой
Гӏалгӏайчен кулгалхочо Келаматанаькъан Махьмуд-ӏаьлас кхайкарал дир, республикан вуза юкъарлонга, лакхарча ишкола хьехархой Ди хиларца дувзаденна. Республикан кулгалхочо белгалдир, лакхара дешар эшаш да мехка болхлой, ӏилман таронаш тоаяра, иштта экономика, вахара хьал дегӏадоаладара. Республиканна из тахан ца хилча даргдоацар да. Эшаш ба дика дийша баьнна говзанчаш, дика кхеташ бола ӏилманхой, вай дешара кӏийле.
Цу юкъе доккха дакъа дӏалоацаш я Гӏалгӏай паччахьалкхен университет. Ше болх беш йолча юкъа, из дика болхлой кийчбара керттера моттиг хинна дӏаэттай. Тахан цун хьалхашка латт доккхий декхараш - дешара дикал лакхъяр, ӏилман проекташ дегӏайоалаяр, кхоачама-технически кӏийле кердаяккхар, кагирхошта ховш дар дукхагӏа юкъедаккхар.
Республикан Кулгалхочо белгалдир, уж толамаш даха таро хургьяц чӏоагӏа говзал йола хьехархой ца хилча, аьнна. Къаьстта профессорий-хьехархой тоабо дӏахьу лакхара академически декхараш кхоачашдара болх, цар дӏалу шоашта ховш дар кердача ноахалашта, иштта шоаш хержача балхаца бехктокхаме болаш хьалкхебу студенташ.
Келаматанаькъан Махьмуд-ӏаьлас баркал аьлар ИнгГУ ректора Ӏалбаканаькъан Фатимайна, ерригача университета тоабанна, цар лакха говзал хиларах, Гӏалгӏайченна эша болхлой кхебара дика дакъа юкъедарах. Цо иштта аьлар; республике лакхара ишкола дӏахо а иштта лакха толамаш доахаш дӏагӏоргхиларах ше дог тийша ва, аьнна.
Тӏеххьара Гӏалгӏайчен Кулгалхочо ловца баьккхар хьехархошта, уж могаш, шоай балха тӏехьа цар керда толамаш доахаш, дика ладувгӏаш бола студенташ болаш хилар ловш.