ГӀалгӀай къаман
юкъара газет

Новости


Гӏалгӏайчено шоллагӏа моттиг яьккхар Россе гӏолла ишколаш, берий бешамаш тоаярах

Гӏалгӏайчено шоллагӏа моттиг яьккхар Россе гӏолла ишколаш, берий бешамаш тоаярах

Гӏалгӏайче юкъе я мехка дешара моттигаш тоаяра даькъ тӏа хьалхара моттиг яьккхарашта. Из латт шоллагӏча мугӏаре. Республико тахан лакха толамаш доахаш хилар белгалдир, «Цаӏ йолча Россе» парте кхетаче йолаш, Россе дешара министра Кравцов Сергейс. Федеральни боахама кулгалхочо белгалдир республике керда дешара моттигаш хьалъяь, цӏенхашта тоаяра балхаш ишколашка, берий бешамашка, колледжашка дӏадихьа хилар. Гӏалгӏайчен Кулгалхо, бахархой цу тайпара дешаш гӏадбугаш да. Цо хьагойт вай мехка дешара хьалаш тоадара, уж дегӏадоаладара дукха балхаш даь хилар, из декхар дика кхоачашдеш хилар.

«2022 шера денз, республике цӏенхаштта тоаяьй 44 ишкол, ялх берий беш, цхьа колледж. 2025 шера Гӏалгӏайче чуйоагӏаш я федеральни боараме ишкола программа дика кхоачашъяьча моттигашта. Цӏенхаштта тоаяр доацаш а, керда дешара моттигаш хьалъяьй. 2019 шера денз, республике хьалйир 50 ишкол, 50 берий беш. Керда гӏишлош хьалъярах, уж кердаяхарах республике цхьан сменах болх беш йола ишколаш 70% я. Цо таро лу берашта лаьрхӏа дешара дика хьалаш хьакхолла, иштта дешара моттигаш кхоачам болаш е»,- аьлар ший телеграм-оагӏон тӏа Гӏалгӏайчен кулгалхочо Келаматанаькъан Махьмуд-Ӏаьлас.

Республикан Кулгалхочо белгалдир, таханарча денга кхоачаш, федеральни программа чудоагӏар дукхагӏа долга. Россе президента Путин Владимира хьаллоацаш, цунна чудоагӏаш да ишколаш тоаярал совгӏа берий бешамаш, колледжаш, студентий баха моттигаш тоаяр. Цу тайпара хаттар кхоачашде таро хиларах, деррига дешара хьал тоаде низ дӏакхоач.

Гӏалгӏайчен Кулгалхочо баркал аьлар Россе Президента, мехка доазонаш иштта хьаллоацаш хиларах. Къаьстта баркал аьлар РФ дешара Министра Кравцов Сергейна, моттигашкара проекташ кхоачашъяра тӏехьа цо иштта дика къахьегарах.

Махьмуд-ӏаьлас белгалдир, Гӏалгӏайче дукха дезалаш хьакхоллаш йола моттиг хиларга диллача, дешара моттигаш кхоачам болаш хилар лоархӏаме долга. Ишколашка моттигаш хилар, цар хьалаш дика хилар, технически оагӏорахьа уж тоаяр таханарча дено дӏадеххача беса хила деза.

Цунца дувзаденна, республика дӏахо а из болх дӏахьош я, керда дешара моттигаш хьакхоллаш. Республикан Кулгалхочо терко тӏаяхийтар, уж гӏишлош шоай ханнахьа хьалъяь а яьнна, болх бе йолаялар лоархӏаме хилара, цар дикал лакха хилара. Цу дерригане керттердар да, берашта дешара, хургбола говзанчаш кхебара дика хьалаш дола моттигаш хьакхоллар.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде
Вверх