Гӏалгӏайчен Кулгалхочун къаманца къамаьл хинначул тӏехьагӏа, Шолжерча транспортаца дувзаденна хаттар кхоачашдир
Транспортаца дувзаденна хаттар делар Гӏалгӏайчен кулгалхочунга Келаматанаькъан Махьмуд-ӏаьлага, эфире гӏолла къаманца къамаьл долча хана. Шолже яха Налганаькъан А. латкъаш яр Заовражни оалача кхален даькъ тӏа юкъара транспорт лелаш цахилара. Цо яхачох, цу даькъ тӏа дукха дешархой, студенташ бах, царна хала да хӏара дийнахьа деша аха, шахьара администрацега из дехар цкъа даь а ӏийнадац, бакъда хувцаденна хӏама дац.
Гӏалгӏайчен автомобильни наькъа, транспорта Министерствон викало ма аллара, боахама говзанчаша из хьал техкад, хӏанз цига болх бе йолалу автобусаш. Уж леларгйола оагӏув вӏашагӏъеллай, хӏанз яхьанна лаьрхӏа каьхаташ кийчдеш да. Цу даькъ тӏа болх беш мала хургва къоастадергда оагӏой бетта 1-ча денга кхоачаш, цо дӏалоац цхьа бутт гаргга ха, наькъаш тоадаь даларга а ца хьежаш, из болх дӏаболабергба.
Керда транспорта никъ ӏобулларгба, Шолжа администрацеца дага а баьнна. Цун чубоагӏаш хургба 500 метр йола жагӏа хьаьрца никъ, цига асфальт ӏобулларгба 2027 шера, Сенни урамгара кердача ишколага кхаччалца.
Автомобильни наькъа, транспорта министра гӏончас ӏарчакханаькъан Ахьмада белгалдир, республике юкъарлон транспорт эшаш хилар, бакъда автопарк даим кердайоалаш я. Цу тайпара, ардара бетта 27-ча дийнахьа денз, «Ингушавторанспорта» мугӏаре яьннай керда ийс автобус, уж эцаш дӏадахар 86,4 млн сом, «Вахара хьалаш хьакхоллар» яхача къаман проекта чудоагӏаш. Царех цхьа дакъа машинаш дӏаяхийтар Шолжен-Серноводска наькъ тӏа. Ерригаш а 2023 шера денз, республиканна 117 автобус ийцар, кхы а ийс техника эца лаьрхӏад 2027 шера.
Республикан кулгалхочо дӏахо из хаттар тахка аьлар Гӏалгӏайчера РФ сенатор волча Хамченаькъан Беланаца, Россе Минтрансаца цхьана, республике юкъарлон транспорт эшаш хилара мах оттабе.