24 шу дизарца «Цаӏ йола Росси» даькъалайийцар Мехкадас
24 шу дизар дездеш я тахан «Цаӏ йола Росси» яха берригача мехка политически парти. Болх дӏахьоча юкъа лоархӏамедараш кхоачашдеш хьайоагӏа парти, керттердарашта юкъе дакъа лаца кийча йолаш, аьнна, белгалдир вай мехкадас Келаматанаькъан Махьмуд-ӏаьлас «Цаӏ йола Росси даькъалаювцаш».
Республикан кулгалхочо белгалдир, «Цаӏ йола Росси» ӏаьдала болхлошца, муниципалитеташца, депутаташца моттигерча политически, иштта кхыдолча вахара оагӏонашца дакъа лоацаш хьайоагӏаш йолга. Парте къахьегаш, дикка толамаш даха аьттув баьннаб вай.
«Мехкара моттигаш тоаяра тӏехьа, экономически, иштта унахцӏенон, ӏилман, дешара, наьха вахарера, культуран оагӏонашцара хьал меттадоаладеш лоархӏаме проекташ я йоаржаяьраш», - теркалдир Мехкадас. Мехка кулгалхочо иштта белгалдир, СВО доакъашхошта, цар дезалашта гӏо деш парте къахьегар. Россе кердача моттигашкарча бахархошта, Запорожски областе гӏо лоаттадеча юкъе лоархӏаме дакъа дӏалаьцад «Цаӏ йолча Россе».
