Госнаркокомитета кхетаче дакъа лаьцар вай Мехкадас
Наркотикашта духьала къовсам лоаттабеча Россе Паччахьалкхен комитета кхетаче дакъа лоацаш хилар вай мехкада Келаматанаькъан Махьмуд-ӏаьла. РФ чухьарча гӏулакхех йолча Министерствон кулгалхо Колокольцев Владимир вар видеоконференцега гӏолла кхетачен кулгалдеш хиннар.
Кхетаче дийцар наркотикашта духьала къовсам лоаттабарца дувзаденнарех, иштта тӏадоагӏача шера кхоачашде дезараш белгалдир цига. Вай мехкадас Келаматанаькъан Махьмуд-ӏаьлас белгалдир, наркомани яха доккха зулам тахан ӏаьдала болхлоша, иштта кхыйолча моттигаша, дерригача адамо геттара чӏоагӏа къовсам лоаттабеш хоададе дезаш доккха во долга. Иштта вай мехкарча хьалах дийцар Мехкадас.
Карарча хана дӏаязваь латтараш 1766 саг ва. Дӏадахача шера хинначул кӏеззига лохагӏа да из хьал. 2025-ча шерарча 11 бетта дӏаяззбаьраш 47 саг ва, хӏаьта 2024-ча шера - 84. «Мехка из хьал тоалуш латтар тахан ишколашка, иштта кхыйолча дешара моттигашка ӏаьдало, лораша, дийшача наха кхетаченаш еш боккха болх дӏакхахьар да. Из зулам хоададаь вайна юкъера дӏадоаккхаргдолаш кхоачашде дезараш кхы а дукха да», - белгалдир Мехкадас.
Лоархӏаме дакъа дӏалоацаш я цу юкъе эргаяьккха тоаеш латта наркологически диспансер. Иштта тахан вай мехка из хӏама хьокхаденнарашта меттабахка гӏо деш кхаь оагӏонцара болх ба. 40%-га кхоачаш бола дарба даь арабаьннараш шин шера, иштта дӏахо а дикка меттаотташ болх дӏахьош хул. Иштта республикерча психиатрех, наркологех йолча моттиге доккха гӏо де хьож цу наха.
«Лорий суда-наркологически экспертизаш йоахаш, иштта цу наха гӏо дарах йола программаш йоаржаеш, меттабахкара тӏехьа царца боккха болх лелабеш къахьег тахан. Наркотикаш яха дохьаж вайна юкъера хаьдда дӏадала дезаш да», - аьлар Мехкадас.
