Хицарча кхоачамбоацарех дувцаш, кхетаче дӀайихьар Мехкадас
Хица дувзаденнача кхоачамбоацарех дувцаш, кхетаче дӀайихьар мехка.
«40 градусага кхоачаш йӀовхал латтача хана, хий цахилар йоккха хало я наха, из кхетадеш ва со. Из хьал тоадара тӀехьа тахан тхоашта могар деш къахьегаш да тхо», - белгалдир вай Мехкадас.Цун зарбан болх лелабераша белгалдечох, 2023-ча шера «ЦаӀ волча оператора» ГУПо болх дӀаболабича денз, карагӀдаьннараш кӀезига дац.
Хин турбашкара 2800 хатар юстардоаккхаш, керда гӀирсаш увттадеш, иштта кхыдола хувцамаш деш, къахьийгад мехка. Бакъда, мел чӀоагӀа къахьеггашехь, тишъеннача турбаша боаггӀача боараме болх биц, къаьстта чоалхане латт из хьал Наьсаре, Пхьилекъонгий-Юрта. ХӀара моттиге цу хӀаман тӀахьожам лоаттабергболаш штабаш вӀашагӀъехкай. Цу тоабашта хьалха латт администрацешкара кулгалхой.
Иштта Мехкадас дийцар, лаьттан доазош боаггӀача боараме каьхаташца дӀачӀоагӀдара тӀехьа терко ярах, коммунальни оагӀонцара ахча дӀателар бахархошта аттагӀа хургдолча тайпара тоадарах. Таханарча дийнахьа бахархошта хий кхахьа араяьха лелараш 14 машин я. «Администрацей кулгалхоша бахархошта дӀайовзийта еза хий эшарах хоам беш йола телефона номераш, иштта цу балхаца дувзаденна кхыдараш.
Дарбанчий, ишколай, базара, иштта дукха адам тӀалаттача моттигашка, массанена гургболаш хьалтоха беза из хоам»,- аьлар вай Мехкадас. Иштта цо белгалдир, наха ахча дӀателара болх ледара латтилга: 57 эзар совгӀа болча нахах, ахча дӀателараш 9 эзар саг мара вац.
«Вай массане цхьана ураэтта, тоабе безаш болх ба из, массане къахьегамца юстарйоахалургья вайна цхьан юкъа этта уж халонаш»,- аьлар Макшарипа Махьмуд-Ӏаьлас.
