Гӏалгӏайчен Кулгалхочо доазонцарча кхела кхетаче дӏайихьар
Гӏалгӏайчен кулгалхочо Келаматанаькъан Махьмуд-ӏаьлас Доазонцарча комиссе кхетаче дӏайихьар. Цига дакъа лоацаш хилар ӏаьдала, бокъонаш лораяра даькъ тӏара кулгалхой, паччахьалкхен доакъашхой, доал деча доакъаш тӏара кулгалхой.
Кертте лаьтта дош дар хьалха тӏаийца хинна декхараш кхоачашдар, нахага, туристашка хоам бара дола хьал дегӏадоаладар, халкъа ха дара даькъ тӏара болхлой хьаллацар, тӏема-патриотически цхьанкхетарий бувзам чӏоагӏбар.
Кхетаче хьаеллаш, Келаматанаькъан Махьмуд-ӏаьлас белгалбир, тахан туристаш хӏара денна дукхагӏа хулаш хиларга диллача, доазон кхерамзлен болх ӏалашо яь хила безилга.
«Гӏалгӏайче дика наха йовзаш йоагӏа: карарча шера вайцига вера 120 эзар саг. Уж ба шоай дезалашца салоӏаш бола нах, кагирхой, вай декхар да царна дика хьалаш лоаттаде. Туристаш Жӏайрахьа кхале бахара йола бокъонаш аттача яха еза, уж хила еза хӏаранега дӏакхоачаш а иштта атта а», - аьлар цо.
Кхетаче иштта шера чаккхе йир. 2023 шера денз, доазон тӏарча боарама бокъонаш телхаяр диазза лаьгӏденнад. Цу тайпара толам баьккхар, уж хьалаш довзийтара болх лерттӏа нахаца дӏахьош хиларах.
Тахан Гӏалгӏайчен бахархошка, хьаьшашка моллагӏа бола хоам дӏакхоач; мобильни гӏирсашка гӏолла.
Иштта дийцар халкъа хаьхой болх хьаллацарах. Тахан Доазон урхаллен балха латт ялх тоаба (41 саг). Карарча шера цар хьалаьцар бокъонаш телхаяь 9 саг, иштта 1000 совгӏа хьехамий кхетаченаш дӏайихьар.
Мехка кулгалхочо белгалдир, Жӏайрахьа кхале ха тӏа латтараш хьаллацара бола болх дӏахьош ба, цу юкъе даьккхад гӏо дарца хоаставеш дола хьалаш, иштта лаьттах цар йоал яла ца езаш хилар. Заседане доакъашхой хьажар патриотически кхетам балара хаттарашка. Республике болх беш я «Анзорий къона доттагӏий» яха бархӏ тоаба, цун чувоагӏаш ва 160 дешархо. Царна лаьрхӏа каст-каста дӏахьу денала урокаш, экскурсеш, спортивни кхетаченаш.
