Галашка санатори-хьун ишкол хьалъеш, дӏахьоча балхага хьежар Мехкада
Галашка, санатори-хьун ишкол хьалъеш, дӏахьош латтача балхага хьежар вай мехкада Келаматанаькъан Махьмуд-ӏаьла. Юртарча моттигий хьал тоадарах йолча паччахьалкхен программага гӏолла дӏахьош ба болх. Балхага хьежжа, ишколан кулгалхочунца, балха хьалха латтачунца къамаьл дир Мехкадас. Кхозза вӏаштӏаръяь хургйолча ишколан ши гӏат урагӏйихьа яьннай, кхоалагӏча гӏата болх дӏахьош боахк цига карарча хана.
2026-ча шера гӏишлон балхаш йистедаьха, чухьа эшаш йола хӏамаш ӏооттае лерхӏ цига. Цу балхаца кхоачашде дезараш белгалдир вай мехкадас. Ишкола болх геттара йоккха терко, тӏахьожам беш чакхбаккха беза, аьнна, белгалдир цо. Къаьстта теркалдир берашта, цар даьшта, ноаношта, хьехархошта паргӏата хургйолча тайпара цу чура болх тоабар. Кхача, молхаш ханнахьа хила езилга хьоахадир республикан кулгалхочо.
«Баркал оал аз юртахошта, ер ишкол хьалъе аьнна дехар дарах. Аз тӏа а дилла, юртбоахама гӏулакхех йолча Министерствос юртарча моттигий хьал тоадеча федеральни программанна юкъелаьцар ер болх. Дӏадахача шера Россе Президента Путин Владимира 2026-ча шерга кхаччалца дӏайӏаьхйир из программа; цунга хьежжа, юрташкара хьал тоадара тӏехьа къахьега аьттув ба вай», - белгалдир вай Мехкадас.
1957-ча шера хьалъяьча ишколе 72 дешархо вар, хӏаьта керда хьалъеш латтача гӏишлон 120 бер тӏаэца аьттув ба. 2026-ча шера йистедала дезаш да цигара балхаш. Йиллача хана деррига кийча хургда, аьнна, къамаьл дир цу балха хьалхалаттачо.
