Эггара толашагӏа долча коарча боахамий яхьах котало яьккхача яхархочунца къамаьл хилар вай Мехкадаь
«Эггара толашагӏа бола коара боахам» яхача яхьашка котало яьккхача Пхьиденаькъан Рапиятаца кхетаче хилар вай Мехкадаь. 34 сотех дола доазув дӏалаьца уллача цар коарча бешага хьежар мехкада эггара хьалха.
Тайп-тайпара сомаш, хаьсаш, баьцовгӏаш кхееш ба Пхьиденаькъан дезал цу даькъ тӏа. Хӏаьта иштта коа доахан, коа тӏара оалхазараш, нокхарий леладу цар. Мехкадас баркал аьлар хьинаре лаьттанца къахьегаш, хьаьнала беркат доаржадеш, шоаш леладечунца сакъердалуш болча цу наха.
«Массанена хоза масал да иштта бола нах. Уж мо бола беркате нах бахьан долаш, даха дисад вай къаман юртара ӏадаташ, дезалашта юкъерча наха хьаьнала къахьегаш, вахар тӏехьенгара тӏехьенга кхоачаш дӏадодаш да.
Къаьстта лоархӏаме да кагирхоша иштта дола хӏама теркалдеш, кхетадеш хилар: зӏамиггача хӏамангара дӏадоладеле хьахул доккха беркат; ше леладер дезаш, ший цӏенцара, лаьттанцара безам боккха хилча», - белгалдир Келаматанаькъан Махьмуд-ӏаьлас.
