ГIалгIайчен Кулгалхочун вIашагIкхетар хилар, къоаной Кхела викалашца
Доакъашхоша дийцар вахара хаттараш кхоачашдарах, паччахьалкхен политика моттигашка лелаярах, Кхела доакъашхоша дакъа лоацаш хиларах.
Цига керттера дийца дош дар къоаной Кхело Iаьдала балха шоашкара дакъа юкъедахьаш хила дезилга. Мехкадас белгалдир, Кхел массаза санна лоархIаме моттиг дIалоацаш хилар мехка юкъарча вахаре, хIаьта цун балха говзал эшаш я культуран Iадаташ лорадара, юкъарлон барт чIоагIбара.
«Аз тIадиллача декхарех, къоаной дакъа лоацаш хургба, мохк дегIакхувлара керттера хаттараш кхоачашдеча. Уж дакъа лоацаш хургба хьехамаш деча, паччахьалкхен моттигашка болх вIашагIболлача, цига шоашта хетар хьалхадоаккхаш, вахара бехктокхам чIоагIбара нахаца болх дIахьош», - аьлар ГIалгIайчен Кулгалхочо.
Иштта дийцар къоаной Кхела керттера декхараш. Кхетачен доакъашхоша белгалдир, юкъарлон цхьоагIо, барт хила безилга тайп-тайпарча наха юкъе; иштта коммунальни хьалех бола мах дIалуш хилара уж тIахьехар, лоархIамеча декхарах дола цхьа хаттар да. Ший доалахьардар законо дIадехача беса хьатIаяздаь, нийса леладеш хилар, иштта дезала гIулакха Iадаташ лорадар.
Теркама юкъе дар наркоманеца дувзаденна хаттар а. ЛаьрххIа болча хоамо яхачох, 2000 совгIа саг наркологически учёте латт, хIаьта из хьал чоалханегIа да республике гIолла дар дIалаьрхIача.
ЛаьрххIача операце вай бIухой тахан дакъа лоацаш хилар дувцаш, мехка Кулгалхочо белгалдир, царна доагIаш дола лорий новкъостал даим лоаттадеш хилар.
«Аз могадир къоаной Кхела балха юкъе дикагIа дакъа лацар. Царца лерхIам хиларо, цар вахара говзало таро лургья дезалашкара хьал аттача даккха, сихагIа кхоачамбоацараш гучадаьха, уж юстардахара шо-шоай боахамашка дIадахьийта», - аьлар Келаматанаькъан Махьмуд-Iаьлас.
Цул совгIа, гулбеннараша ладийгIар лораша, дешара даькъ тIарча, вахара даькъ тIарча викалаша шоай балха тIа даьр дувцарга. Цу хIара даькъ тIа тахан дIахьош ба лаьрххIа вIашагIбелла болх, психологически, материальни новкъостал деш.
«Оаха барт бир, вай турпалхошта даим терко лоаттаяра дола декхараш кхоачашдергда, аьнна. Керттердар - хIара дезала хоалуш хила деза, шоаш паччахьалкхено хьаллоацаш хилар», - аьлар ГIалгIай Республикан Кулгалхочо.
Кхетаче чакхйоалаш, лаьрхIар цхьана дIахьоргбола болх вIашагIболла, каст-каста кхетаченаш дIакхахьа, юкъарлон комиссеш хьакхолла, цу лостамах болх бергбола.
