«Профессионалитет» яха программа йоаржаю болх, лакхача боарам тIа дIабодаш ба вай мехка
«Кагирхойи бераши» яхача къаман проекта «Профессионалитет» яха федеральни программа йоаржаяра тIехьа дикка толам боаккхаш ба вай мохк. Федеральни оагIоно лакха мах оттабир вай мехка дIахьоча балха.
Мехкадаь зарбан болх лелабераша белгалдечох, программанна лаьрхIа хьакъоастадаьр 77,4 млн сом ахча дар. Iарпенаькъан Ювсапа цIерах йолча политехнически колледже дIахьош я из программа. Карарча хана цу гIулакха эшаш мел дар Iалашдеш боахк цига.
«Ингушнефтепродукт» а «Ингушнефть» а яхача вайцигарча компанешца бувзам болаш, дIахьош ба из болх. «Дешара моттигашта, болх лоаттаберашта юкъера бувзам чIоагIбеш хургда из беркате гIулакх», - белгалдир вай мехкадас Келаматанаькъан Махьмуд-Iаьлас.
Мехка кулгалхочо хьоахадир, цу программанна юкъе дакъа лацар вай мехкарча экономически оагIонца лакха говзал йола болхлой кийчбара тIехьа чIоагIа лоархIаме долга.
«Мехкара кагирхой тайп-тайпарча оагIонашцара говзал йолаш, вайцигара эггара чIоагIагIа эшаш бола болхлой хинна дIаотта низ, хьинар хургдолаш, къахьега лаьрхIа да тхо тахан», - аьлар цо.
