ГӀалгӀай къаман
юкъара газет

Новости


Гӏалгӏайчен 103 млн сом лургда ЖКХ, энергетика дегӏайоалаяра

Гӏалгӏайчен 103 млн сом лургда ЖКХ, энергетика дегӏайоалаяра

Россе Паччахьалкхено Гӏалгӏайченна лургда ЖКХ, энергетика дегӏайоалаяра 103 млн сом. Из чудоагӏаш да 2022 шера дӏадоладаьча республика массайолча оагӏорахьара хьаллацара. Из ахча даларо таро лургья вахара хьал тоаде, Цаӏ йолча оператора даькъ тӏара болх кердабаккха, болх дика бовзаш бола говзанчаш юкъебаха, хьалаш лоаттадара даькъ тӏара болх дика дегӏабоалабе. Цу юкъе, наьха вахара хьалашка дӏадодар тӏакхеташ хургдац - цун башхало меттаоттаеш я федеральни бюджет.

«Цу тайпара новкъостал республикан хьалхара деш дац. 2022 шера, федеральни бюджетера 107 совгӏа миллион хьахьожадир Цаӏ йолча оператора болх тоабара, иштта цаӏ йолча расчётни центра лаьрхӏа. Гӏалгӏайче мехка 2023 шера маьтсела беттагара 2024 шера ардара беттага кхаччалца хьадера 640,1 миллион сом. Из лаьрхӏа дар маьхаш лакхдара хьал аттача даккхара. Цо таро елар, Цаӏ йолча оператора болхлошта деррига алапеш дӏадала, иштта йоалах, электроэнерги лелаярах дола декхар дӏадала. 2024-2025 шерашка, федеральни ахчаш дӏахо а хьадайташ дар. Республиканна тӏехьара тӏа программаш кхоачашъяра 79,7 миллион сом делар 2025 шера, иштта 132,5 миллион сом делар, республикага доаллаш хинна декхар дӏадаккхара. 2026 шера, саькура бетта лаьрхӏа дар 98,5 миллион сом дала, 2025 шера лайчилла беттагара 2026 шера тушола беттага кхаччалца йола программаш кхоачашъяра», - аьлар Гӏалгӏайчен кулгалхочо Келаматанаькъан Махьмуд-Ӏаьлас.

Республикан кулгалхочо яхачох, цох хьабоала пайда гуш ба. Тӏеххьарча кхаь шера республикан хин боахама даькъ тӏа нийслуш хинна 2 800 хьал тоаде таро хилар, иштта 16 километр хин турбаш хийцар. Цаӏ йолча оператора даькъ тӏара таронаш вӏашагӏтохар бахьан долаш; хица ӏалашо яр, хий чудиллара хаттар тоаде таро хилар.

Гӏалгӏайчен Кулгалхочо белгалдир, коммунальни даькъ тӏа кхы а кхоачашданза хаттараш дус. Боахамаш шоай болх тоабара терко тӏайохийташ хила деза, цо таро лургья дӏадодар цхьан боарам тӏа даккха. Цудухьа федеральни ахча юкъедаккха деза, цул совгӏа пайда эца хьажа деза, авареш кӏезигагӏа хулийтара, дика хьалаш лоаттадара.

Республикан кулгалхочо белгалдир, Россе Президента Путин Владимира, Паччахьалкхен Председатела Мишустин Михаила, даим республиканна терко лоаттаярах из деррига деш хилар. Цо аьлар, республиканна ший оагӏорахьа тӏахьожам лоаттабергба, деррига хьалхашка латта декхараш кхоачаш мишта ду хьожаш, дӏадодар нийса леладара. Дикал йола коммунальни хьалаш бахархошта лоаттадар - из керттера да.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде
Вверх