Магӏалбика кхале лаьттан, йоала балха тӏахьожам бергба
Гӏалгӏайчен Магӏалбика кхален администраце кулгалхочо Къоастой Ӏаддал-Хьамида балха кхетаче дӏайихьар, цу хаттарех болча кулгалхошца. Керттера дийца дош дар доал деча даькъ тӏарча лаьттан, йоала болх тӏахьожам болаш лелабар.
«Сердало» газетага Магӏалбика кхален администраце зарбан болх лелабераша ма аллара, цига дийцар лаьтташ леладара хьал карарча хана мишта хьажар. Къаьстта терко тӏаяхийтар лаьттан закон телхадеш йола моттигаш гучаяхара, наха ӏаьдала бокъонах доацаш лаьтташ дӏалийцадий тахкара.
Кхетаче белгалдир кхален таронаш нийса лелаяра дош. Гулбеннараша дийцар моттигерча бюджете йоалах дола ахча хьагулдара, иштта бахархоша вахара-коммунальни хьалаш леладарах дола декхар хьадалара болх тоабе безаш хилар.
Кхетачен чаккхе еш, Къоастой Ӏаддал-Хьамида аьлар, уж хаттараш кхоачашде дезарех да, цудухьа администрацей доакъоша шоайла айхха бувзам лелабе беза. Бехктокхаме болча кулгалхошта, дӏахо из болх тоабара хоадам бола декхар тӏадиллар.