Хӏама эцара болх вай мехка боаггӏача боараме дӏахьош ба
Россе йохкарах, эцарах йолча промышленни палате хӏама эцара балхах лаьца дийцар. Дӏабихьача тохкамах, цхьаццадараш эцаш дӏабихьача 15, 8 трлн ахчах латтача 3,2 млн балхах вай мехка болх лакхача боараме чакхбаккхарах дола сертификат делар Къилбаседа Кавказе вай мохк белгалбеш.
Вай мехкадас Келаматанаькъан Махьмуд-ӏаьлас теркалдечох, хьурмата оагӏонца дувзаденнараш лерттӏа леладар да из. Цу гӏулакхо рузкъа харцахьа, зехьа дайтац; зӏамига, йоккха бизнес а хьаллоац.
«Федеральни политикага хьежжа дӏахьош болх ба из тахан. Россе Президент волча Путин Владимира массехказа белгалдаьд, кхоачам хьачуэцара болх боаггӏача боараме, цӏена дӏахьош хиларо ахча кходайт, цу оагӏонца дувзаденнараш нийсса хьаоттадайт», - белгалдир вай мехкадас.
Теркалде деза, вай республиканна хӏанз пхезлагӏа из сертификат луш долга. 2023-ча шера СКФО дерригача мехкашта юкъе из болх боаггӏача боараме дӏахьош я, аьнна, белгалйир вай республика.
