Унахцӏено лораеш, вахар дӏадахьара даькъе хьалхарчарца ба вай мохк
Вахар, унахцӏенон хьал лорадеш, дӏадахьара тӏехьа дикагӏчарна юкъе ба вай мохк. 86,9 балл йолаш, кхоалагӏча моттиге я республика.
Вай мехкадас Келаматанаькъан Махьмуд-ӏаьлас белгалдир, дуккхача шерашка бахархоша, тренераша, лораша, даьша- ноаноша къахьегаш хьахинна толам из болга. Таханарча дийнахьа мехкара 57% бахархой спортаца бувзам лелабеш ба. Стадионашка, спортзалашка, иштта дийлла латтача спорта лаьрхӏача доазонашка; хӏара денна дукхагӏа хул нах.
«Укх тӏеххьарча ялх шера цу оагӏонца дикка къахьегаш латт вайцига. 2019-ча шера денз, Россе Президента юкъеяьккхача «Демографи» яхача къаман проектага гӏолла; спорта лаьрхӏа 20 моттиг хьайийллай вай, итташ совгӏа доазош да ГТО лаьрхӏа, иштта 50 совгӏа спорта клубаш я болх беш», - белгалдир вай Мехкадас. Спортаца бувзам хиларо наьха могашала дикка пайда белга гуш да тахан.
Берригача мехка латтача юкъерча боарамал лакхагӏа да вайцигарча наьха вахара гӏулакх, вай мехкахой 78 шу совгӏа бах. Бакъда, белгалде деза, спортаца бувзам лелабеш санна; могаш, дӏаьха вахар долаш хургволаш; буаш болча кхачан терко е езилга, хан-ханнахьа тӏаводаш, лорашка чакхвоалаш хила везилга. Цу оагӏонца дикка къахьегаш ба тахан республике.
