«ЗӀамигача Даьхен доккхий хаттараш Москве дувцар» яха кхетаче
Россе столице «ЗӀамигача Даьхен доккхий хаттараш» яха кхетаче-гойтам хилар, из вӀашагӀбеллар «Росси – тароний мохк» яхача Президента майдан тӀа. ГӏалгӀайчера цига дакъа лоацаш ба – доал деча даькъ тӀара Кхела кулгалхо Лаьнанаькъан Ахьмад, Магаса мэр Тиймарзанаькъан Муса, иштта шахьара Кхела кулгалхо Дарсиганаькъан Хаваж-Бахьаудин.
Цу кхетаче берригача мехкара гулвелар 750 саг, иштта Россе Паччахьалкхен доакъашхой, парламента, президента Администраце викалаш.
ГӏалгӀайчен Кулгалхочо Келаматанаькъан Махьмуд-Ӏаьлас белгалдир; цига гӀалгӀай викалаш хилар лоархӀаме да, аьнна. Цо аьлар, цу кхетачено таро лургья мехка бахархошта, пайда луш йола проекташ кхоачашъе.
«Къаьстта доал деча даькъ тӀа дикагӀа довзаш хул бахархой хьашташ. Укхаза тӀаэцаш да хӀара деннарча вахаре эшаш дола дешаш кхоачашдар – урамаш тоадаргара вахара моттигашка кхаччалца», - аьлар республикан Кулгалхочо.
