Ишколашкара кхерамзлен хьал чӀоагӀдергда, дешара шу долалуча дийнахьа
Дешара шу хьатӀаотташ, ишколашкара кхерамзлен хьал лакхача боараме хилийтара тӀехьа дӀабахьа безача балхах дувцаш йола кхетаче дӀайихьар вай мехкадас Келаматанаькъан Махьмуд-Ӏаьлас. Из хоам «Сердалога» бир Мехкадаь зарбан болх лелабераша.
Дешара шу хьатӀаоттарца, хьинаре болх беш хургба МВД викалаш.
«Вай декхар - массайолча моттигашкара гӀулакх боаггӀача боараме дӀадахийтарга, цӀерцара хатараш цахилийтарга, терроризм яхача зулама духьалара кийчо ишколашка лакхача боараме хилийтарга хьажар», - белгалдир Мехкадас.
Йоккхий кхетаченаш дӀахьоча моттигашка полици, МЧС болхлой, сиха оарцагӀъухача лорий машин хила еза.
Дешара шу дӀадоладе кийча я вай мехка 242 дешара моттиг. Уж я 149 ишкол, 86 берий беш, 7 юкъерча дешара моттиг. Кхетаче иштта дийцар, экологически оагӀонцарча кхерамзленах; къаман, федеральни проекташ йоаржаеш, дӀабахьа безача балхах.
