«Россе хий» яхача болама юкъе дикагӏчарех ба вай мохк
Хиш, хин оагӏонаш цӏендеш дӏахьоча боламе дикка белгала я вай республика. «Эггара йоккхагӏа йола кхетаче» яхача оагӏонца, 20 эзар совгӏа нах гулбенна Эса оагӏонаш цӏендеш дӏабихьача балхах котало яьккхар вай мехко.
Мехкадаь зарбан болх лелабераша белгалдечох, 2025-ча шера дӏадихьача боламашка дакъа лаца арабийннаб 99 эзар совгӏа нах. 650 км хин оагӏонашкара моттигаш цӏенъеш; 11, 9 эзар кубометр нувхаш я гулъяьраш. Вай мехкадас Келаматанаькъан Махьмуд-ӏаьлас белгалдир, нах вӏаший барт болаш хилар да из аьнна.
«100 эзар гаргга нах бар духхьал укх шера хин моттигашка лостам бе арабийннараш. Цу юкъе бар гӏо деш лелараш, студенташ, дешархой, тайп-тайпарча моттигашкара къахьегамхой», - теркалдир Мехкадас. Цо яхачох, къаман проекташ йоаржаяр а дикка пайда беш хилар цу оагӏонца.
Вай мехка массахана раьза болаш хьаллоацаш хиннад цу оагӏонцара боламаш. 2017-ча, 2020-ча шерашка хьалхарча моттиге латтар вай цу гӏулакха. Ийс шера республике 180 совгӏа цу оагӏонцара кхетаченаш дӏайихьар, 1, 29 млн нах бар ӏаламах, мехках дог лазаш къахьега арабийннараш.
2026-ча шера а тӏатеӏӏа дӏахобахьа лерхӏ из болх. Эсанна, Наьсара, Шолжанна гонахьара моттигаш цӏенъеш, экологен хӏама меттаоттадеш къахьегаргда мехка.
