Ерригача Россе гӏазкхий тхьамада кхаьчар вай мехка
Ерригача Россе гӏазкхий оагӏон хьалха латтача, РФ Президента СКФО викала гӏонча волча Кузнецов Виталеца кхетаче дӏайихьар вай Мехкадас.
Вӏашагӏкхетаре дийцар къамашта юкъера барт, бувзам чӏоагӏбарах, СВО доакъашхошта гӏо лоаттадарах, кагирхошта нийса кхетем луш, гӏазкхий оагӏоно дӏахьоча балхах. Къаьстта йоккха терко еш дийцар Ерригача Россе гӏазкхий тоабан юкъе чуболхаш болча бӏухошта терко ярах.
«Вай мехкадас цу кхетаче белгалдир, къамаш вӏаший бувзам, барт болаш, шоайла оагӏув хьаллоацаш хилар чӏоагӏа лоархӏаме долга, къаьстта мехка хала ханаш эттача.
Къилбаседа Кавказерча ерригача моттигашта лоархӏаме хиннад, тхьоврача хана денз, Россе къамаш вӏаший барт, цхьоагӏо йолаш дахар», - аьлар мехка кулгалхочо.
Мехкадас мел дувцар хьаллоацаш, раьза волаш, къамаьл дир Кузнецов Витале. Дӏахойодача хана а вӏаший бувзам болаш, цхьана болх дӏабахьарах дийцар кхетаче.
Келаматанаькъан Махьмуд-ӏаьлас Кузнецов Виталена баркал аьлар, республикерча юкъарлен оагӏонцарча балха юкъе гӏазкхаша дакъа лацарах, гӏо дарах.
