Вай мехкарча кулгаш гӏертадераша дунен чемпионате ворхӏ майдилг яьккхар
Гӏалгӏайчен спортсменаша ворхӏ майдилг яьккхар, кулгаш гӏертадарах дунен чемпионат йолаш, укх деношка из дӏахьош я Инде столице. Дунен керттерча яхье Деле гулбелар чӏоагӏагӏа бола дукхача мехкашкара доакъашхой. Цига дакъа лоацаш ба ондаргаш, боккхий атлеташ, ветеранаш, цхьацца могашал эшаеннараш. Цар хӏара сцена тӏа арабалар да, чӏоагӏа оамал, низ гойташ. Россе сборне дика толамаш даьхар Гӏалгӏайчен спортсменаша дика дакъа юкъедера тоабан толама.
«Сердало» газетага Гӏалгӏайчен спорта Министерстве ма аллара, 90 кг дозал дарашта юкъе дото совгӏат даьккхар Тиймарзанаькъан Ибрахӏима. 110 кг дозал долаш, дика толам баьккхар Баркинхой Адама, цунна елар дото, борза майдилгаш, аьтта а аьрда а кулгаш гӏортадарах. Иштта шиъ борза совгӏат даьккхар, шаккхе кулг гӏортадаь, могашал эшаеннарашта юкъерча дунен чемпионате Хьулахой Ислама. Кхы а шиъ майдилг яьккхар Чомаканаькъан Хьамида, из вар 110 кг дозал дарашца аьрда, аьтта кулгаш гӏертадеш.
Цу яхьашка уж кийчбаьраш ба лакха говзал йола хьехамчаш Котанаькъан Хьусен, Тиймарзанаькъан Ибрахӏим. Гӏалгӏайчен кулгаш гӏертадеча говзанчаша халкъашта юкъерча спорта даькъ тӏа котало яккхаро чӏоагӏду, республикан спорт дегӏайоалаяр хьал лакхача боараме хилар.
