Гӏалгӏайчен Къаман библиотеке хьабийллар полице Денна хетабаь гойтам
Янданаькъан Жамалдий цӏерагӏча Къаман библиотеке хьабийллар «Закона гӏулакх дар - халкъа гӏулакх дар» яха книжкай-каьхатий гойтам, из хетабаь бар, лайчилла бетта 10- ча дийнахьа бокъонаш лораерий болхлой цӏай хилара. Из цӏай дездеш хилар дӏадолалу 1917 шера, цу хана РСФСРа чурча гӏулакхий Наркомата соцамах, юкъарлон цхьоагӏо лораяра хьакхеллар милице болх. Ах бӏаь шера, 1962 шера денз, из Ди милице цӏай лоархӏаш хьадоагӏа, боахамашка хувцамаш хинначул тӏехьагӏа 2011 шера цӏайна цӏи хийцар - РФ чурча гӏулакхий болхлой Ди.
«Тха гойтаме къаьгга го йиш я из ха отташ хиннача керттерча оагӏонех дувцаш йола материалаш, юкъарлон вахаре малагӏа дакъа дӏалоацаш из дегӏаденад. Гойтаме иштта да бокъонаш лораяра ӏаьдал хьакхолларах дола дувцар, дӏаяхача замах цо малагӏа декхараш кхоачашдеш хиннад ха йиш я, тахан царна хьалхашка латта лоархӏаме декхараш довза таро я», - аьлар «Сердало» газетага из гойтам вӏашагӏбеллараша.
Цига керттера моттиг дӏалоацаш да «Полице» Федеральни закон, иштта историко-мехктохкама къахьегам. Къаьстта дешархой терко тӏаозаш да Курылев И.В. «Нохч-Гӏалгӏайчен милице тӏема никъ» яха книжка, иштта «Гӏалгӏайчен уголовни розыска йоазув» яха кхоллама болх.
Из доацаш а, гойтама чуйоагӏаш я республикан бокъонаш лораяра моттигашка болх баьча наха карагӏдаьннар дувцаш йола биографически материалаш, амала ветеранех дола дувцараш, классически исбахьален литература.
