2026-ча шера дӏабихьача балхах дийцар единороссаша
«Цаӏ йолча Россе» моттигерча оагӏоно дӏайихьача хӏара шерарча конференце белгалдир, 2026-ча шера партийни оагӏонца кхоачашдаьраш. Делегаташта, кхетачен доакъашхошта хьалхашка лаьрхӏа доклад ешаш вар моттигерча оагӏон секретарь вола Илезанаькъан Микаил. Ший къамаьла юкъе къаьстта терко йир цо хоржама кампане болх боаггӏача боараме дӏабахьара, Къаман программага гӏолла кхоачашде аьттув баьннарашта, иштта бахархошцарча гӏулакха.
Илезанаькъан Микаила белгалдаьчох, 2026-ча шерара болх Россе Президент волча Путин Владимира, иштта вай мехкадас Келаматанаькъан Махьмуд-Ӏаьлас къоастадаь декхараш кхоачашдеш хилар. Цу юкъе лаьрхӏа моттиг дӏалоацаш дар бӏаьстан тӏехьарча бетта дӏадихьа хоржамаш. Цу юкъе дакъа лоацаш вар 140 совгӏа кандидат, 40 эзар совгӏа мехкахой арабаьлар хоржамашка дакъа лаьца, шоай декхар кхоачашде. Партийни института хӏама бахархоша лакха лоархӏаш хилар дар из.
Цаӏ долча хоржамий денга кийчо еш, боккха болх дӏабихьар ала деза партийцаша. Шахьарашкарча, юрташкарча бахархошца, къахьегама тоабашца тайп-тайпара йола 1000 совгӏа кхетаче дӏайихьар мехка. Къаьстта йоккха терко еш хилар ветеранашта, тӏема операце доакъашхошта, цар дезалашта; вахарера кхоачамбоацараш меттадоаладара тӏехьа. Тов бетта мехка дӏадихьача хоржамашка котало яьккхар «Цаӏ йолча Россе».
№16 йолча хоржама оагӏонца дакъа лоацаш хиннача парте депутата Татренаькъан Муслима тӏехьа кхадж тессар 81,99% бахархоша. Федеральни хоржама оагӏонца партийни гӏулакха тӏехьа 90, 44% наьха хоржам бар, хӏаьта Халкъа Гуллама хоржамашка партена тӏехьа шоай оаз дӏаелар 80, 84% болча наха.
Белгалде деза, единороссий Къаман программага гӏолла тахан мехка 10 эзар совгӏа болча бахархой дехарех болх дӏабихьалга. Цу юкъе да керда ишколаш, берий бешамаш хьалъяр, воча хьале хиннараш кердача куца тӏа йоалаеш къахьегар; иштта дарбанчеш, наькъаш, керда хин оагӏонаш, юкъарлон оагӏонцара моттигаш меттайоалаеш болх чакхбаккхар.
Цул совгӏа, дӏахойодача хана кхоачашде дезараш къоастадаьд цу оагӏонца. Тӏадоагӏача шера ийс ишкол, йиъ берий беш тоаеш болх дӏабахьа лерхӏ мехка. Иштта кхыйолча моттигий хьал эргадоаккхаш, Ахабоарзен хий хьалу моттиг хьалъяра къаьстта йоккха терко еш хургба республике.
Илезанаькъан Микаила, гулбеннарашка къамаьл деш, дӏахойодача хана кхоачашде деза декхараш кӏезига доацилга; хьинаре, бехктокхаме къахьега эшилга белгалдир. «Цаӏ йолча Россе» болх, Къаман проекташ йоаржаеш, бахархой дехарех къахьегаш, республикера вахара-экономически оагӏонцара лоархӏаме декхараш тӏехдика кхоачашдеш, дӏахьоргба вай мехкадас Келаматанаькъан Махьмуд-Ӏаьлас хьаллоацаш, гӏо деш.
