ГӏалгӀайчен инвестицей кхело могайир кхо проект
Инвестицей кхела гулламе, Келаматанаькъан Махьмуд-Ӏаьлас кулгал а деш, тӀаийцар кхоъ проект могаяр, цар юкъара мах ба 3 млрд сом совгӀа.
Цига хьалхара оттайир Магасе 9-зза вӀаштӀара яь гостиница хьалъяр, 2 млрд сом совгӀа чулоацаш йола инвестице гӀишлон проект я из. «Пхе седкъа», 200 моттиг йола отель хьаелларгья 2028 шера.
Гостиница чуйоагӀаш хургья конференц-зал, 140 моттиг саг Ӏоха йиш йола ресторан, СПА-центр, 60 автомобиль дӀаоттаю моттиг.
АргӀанара проект хилар Наьсаре биъ седкъан гостиница хьалъярца ювзаенна, цу чу а иштта хургья гойтама зал, бизнес-центр. Проекто таро лу 50 сага балха моттиг Ӏалашъе. Цига юкъеяргья 1 млрд сома инвестицеш. Республике цаӀ йоккхагӀа йолчарех центр хургья из, цига Ӏешше болх беш болча говзанчашта лаьрхӀа. Из йистеяккха лаьрхӀад 2030 шера.
Хӏанз ГӀалгӀай мехка дерригаш а 11 хьаьший цӀа да, уж массайолча хана хьалдиза хул. Из да уж кхы а дукхагӀа эшаш хилар а, цар инвесторашта дика таронаш луш хилар а», - аьлар Келаматанаькъан Махьмуд-Ӏаьлас.
КхоалагӀа йола проект я товара лаьрхӀача цӀенача чкъаьран боахам хьабеллара инвестицешца ювзаенна 108 млн сома лаьрхӀа, из кхоачашъяь яргья, 2025 шергара 2032 шерга кхоачаш. Из боахам хьабелларгба Дошлакъа-Юрта, Ӏарамхе; цо таро лу 41 балха моттиг Ӏалашъе моттигерча бахархошта.
Республикан Кулгалхочо иштта белгалдир берашта салаӀа моттигаш Ӏалашъе езаш хилар, цига тӀахьийхар инвестораш берий салоӀама центраш хьалъяра.
«Уж вайцига геттара а кӀезига я, къаьстта вай дезалаш тӀакхеташ боагӀаш хилар дӀалаьрхӀача. Духхьал 2024 шера даьд 8087 бер, цо хьагойт цу тайпара, къонабарашта салоӀама моттигаш эшаш хилар», - аьлар Мехкадас.
