Хьайбашца къахетаме хила

Газеташка, телевидене, маьждигашка гIолла дуккхача шерашка кхайкарал деш, дувцаш хьадоагIаш дош да из, бакъда хIара дийнахьа гуш долча сурто хьагойт-кх къа цахетарий дегаш меттадоагIаш доацилга. Иштта ца аьлча, кхы мишта аргда из?!

БIаьха никъ ийца гIаш Iойодаш, бIарг кхийтар са тока бIоагIах дIабийхка латтача Iаттах. Шин метрал бIаьхагIа бац из дIабийхка муш. Шийна гонахьара ше дIакхоачаш йола буц йиа даьнна, бIарг ма кхоачча йолча аренна, ховхача, баьццарча баьца маьлхаро бIарахьежаш, тIакхоачача хилча ма юаргьяр-кх аз хьо яхаш санна, матардаха бIаргаш долаш, уллар из миска хьайба. ДIатIаяха, хьай хьашт мел да, хье биззалца сакъердалахь хьайна укх сийнача баь тIа, аьнна, из хьадаста дог доагIар са чIоагIа. КIеззига IоэгIаяьлча, иштта, лоацача зIанарах дIайийхка, йокъаеннача йоархIашта юкъе латтар; хIаман хьисап доацараша цун уйла, бала боацаш дIайихка говр. Фу нигат дег чу леладеш нах ба-хьогI, из тайпара хIама леладераш?!

Фу хьал хила деза, Дала дIа-хьа додаш йоккхача аренашка дажа, шийна чам болашагIа йола буц хьалаха кхеллача хьайбанга, ши метр хиллал йолча зIанарах дIадийхка, Iура денз сарралца йола ха хIара дийнахьа йоаккхаш?!. Халбата воаллача сагагара хьал хургда-кх, иштта леладеча царга. ВIалла уйла хIана яц вай, кхоана Дала хоаттаргдий-хьогI согара из, аьнна! Шоашта царна тIехьа ца хьежа, дукхача наха леладеш ийрча, во гIулакх да из. Тхьоврча хана даьша, ноаноша шоашта уллув дIаувттабеш, къахьега Iомабора шоай дезал, маькха чIегилг хьаяккхара мах бовзийташ, хIама хьадар дезаш кхебора, хоза хеташ, сакъердалуш хьежар хьайбашка, хIаьта таханарчарна хIетта хьалъотташехь дикагIа йола телефон дIабейолл дас-нанас, шоаш дер цхьа дика да мотташ.

Доги кхетами телхадеш мел дола во чудолча цу чура бIарг хьал ца айбеш, дIа мел хьежача гулбеле багIаш хул. Дер дайна ца лелийташ, хьайбан тIехьа каст-каста бIарглакха, аьнна, тIадиллача дикагIа децарий; мискаш, дуне дизза сийна буц хьалъяьннача хана зIы теха ца а лоаттадеш? Массехк шу хьалха дар из... Наьсаре Iочубодаш болча наькъа оагIонца дIайийхкаяр цхьанне газа. Гаьнах лоаца тIирг теха, дIайийхка из миска, из къамаргах хьарчарах, даггара етталуш, къизача ден тIа кхаьча латтар. Даьла къахетамца, арахьежа аз зийра из. Сиха машин соцаяь, дIатIадайдда паргIатаяьккхар оаха из миска.

Боад къовлалуш латташ ха яр из. ДIа-хьа хьежаш латташ цхьа ха яьккхар оаха, газан да тIавоагIаргвацар-хьогI чуйига, яхаш. Иштта дIаехкар цунна кхераме долга, из лечара яьннилга дIаала гIертар тхо, бакъда цига саг тIаванзар; из миска, гIийло корта Iобилла, Iойижар; тхо дIаходахар. Цу хьайбаша хьателаш дола беркат дуаш, царна доагIа доал ца деш, цар кортамукъале йийхка, уж Iазапе лоаттадераша уйла е еза, деррига зувш АллахI волга, бекхам боацаш хIама ца дусилга! Ма хила къиза мискача хьайбашца, ма лоаттаде уж Iазапе, аренаш йизза йолча сийнача баьца тIа дажийта уж, шоашта ма лов, Дала царна хьалтIаялийтай из!