Сердалцарча технологеех бола ГИТИСа дешара болх ба мехка дӏахьош
Театра сцена тӏа къахьегараш гуллуш моттиг хилар Магасе. Театральни кхолламах йолча Российски институто дӏахьош яр сердалцарча таханарча технологешта хетаяь йоккха дешара кхетаче. Ерригача Россера сердал оттаярца къахьегаш бола болхлой юкъелоацаш проект хилар цох. Цу оагӏонцарча вай мехкарча министерствога гӏолла дӏахьош ба из болх вай мехка.
«Сердал оттаярца бувзабеннар исбахьален мотт, театральни режиссуре лоархӏаме гӏулакх хинна дӏаэттад тахан. Вай мехкарча цу оагӏонца къахьегарашта боккха аьттув луш болх ба из. Керттера хьехамча, курса кулгалдер Образцов В. С. цӏерах йолча Паччахьалкхен академически теникий театре сердал оттаярца къахьегаш вола суртанча Бызов Павел Сергевич ва. Тайп-тайпарча театральни моттигашка къахьегаш хьавоагӏача цо ше ӏомадаьчох дувцаргда вайцигарча болхлошта», - хоам «Сердалога» вай мехкарча цу оагӏонцарча министерствос.
Курса программа дукха хӏама чулаьца я. Дешара курс хургья укх бетта 28-ча денга кхаччалца. Хӏара доакъашхочун боккха аьттув луш, дукха хӏама ӏомаде йиш йола моттиг я из.
