Гӏурбан цӏайга боккха болам дӏабихьар вай мехка
Гӏурбан денош гаргакхачарга хьежжа, доккха сагӏа да вай мехка доаккхаш. Кхаь дийнахьа латтаргба из беркате болам. Мехкарча халача хьале болча дезалашта гӏурба де аьнна дӏабекъаргбараш 6 эзар гаргга устагӏа ба. Хӏара шера доаржадеш долча цу беркатеча гӏулакха хьалхалаттар вай мехкада Келаматанаькъан Махьмуд-Ӏаьла ва. Хӏанз ворхӏазлагӏа дӏахьош да, таро йоацача наха доккха гӏо хулаш дола из сагӏа. Халача хьале мел барашта терко е хьожаш ба тахан. Цу доккхача сагӏага гӏолла, Гӏурбан цӏай хила дезача тайпара дӏадахьа аьттув баргба наьха.
«2000 устагӏа тайп-тайпарча муниципальни моттигашка дӏа-хьа бийкъаб, гӏо эшача дезалашка дӏакхоачаргда уж. Дӏадахача шерашка санна, из лоархӏаме цӏай хьаллацара тӏахьех аз берригаш, цу беркатеча денца сакъердалураш ма хулла дукхагӏа хила беза вайна юкъе. Цу болама юкъе дакъа лаьцар РФ Паччахьалкхен Дума депутат волча Бӏарахой Бек-хана, 3000 эзар устагӏа ийцар цо вай мехкарча наха лаьрхӏа», - белгалдир вай Мехкадас.
Республикан кулгалхочо доккха баркал кхайкаду къахетам боаржабеш, наьха оагӏув хьаллоацаш барашта. Сагӏан юкъе гӏоргба таро йоацараш, тӏема операце доакъашхой дезалаш, балха тӏа вахар хаьдача ӏаьдала болхлой дезалаш, цхьаь баха къоаной, иштта кхыбола, гӏурбан лаьрхӏа шоашта устагӏа эца йиш йоацараш. Вай къаман юкъе массахана хиннад халача хьале эттачун оагӏув хьаллацар, могаш дола гӏо дар.
Таханарча беркатеча боламо хьагойт, тхьовра денз хьадахьа дика гӏулакхаш вай мехка тахан а лоархӏаш долга. Динцара деза цӏайш долча хана, Даьла духьа йоаржаеш йола проекташ лоархӏаме маӏан долаш я. Хьал дика доацарашта гӏо дарал совгӏа, вӏаший къахетаме, кӏаьда, оагӏув хьаллоацаш хилар вай къаман юкъе массахана хила дезилга белгалдеш дола доккха дика да из.
