Из вахарцара къастар дукхача наха зийнад

Массане сигнал еттар цунга, шоаш тӀехбоалача хана, хӀаьта удаш воагӀача сага, царга моаршал юхалуш, кулг айдора, ший наькъах ца вохаш. Ше вахача юртара ваьле, Сурхо тӀарча МЧС кхаччалца е Магасерча пенсионни ганзага кхаччалца, веде хьал а вахе, юхавоагӀар из хӀара Ӏуйрийна. Из фу саг ва хатта дезаш хилацар, массарна вовзаш вар из, ший унахцӀенонга хьожаш хиларах. Са ираз хилар цунца массехк шу хьалха вӀашагӀкхета а цох язде а. Цу хана 65 шерал тӀехваьнна вар из. ХӀара Ӏуйрийна удаш, 6 километрал кӀезигагӀа боацаш никъ бора цо.

Из цун унахцӀенонна эшаш а могашал тоаеш а дар. Цунца къамаьл деш, 1990 шера ше ада дӀа мишта волавелар цо дувцаш, аз яздаьдар: «Цхьа ха яр, гlалгlаша оалаш ма хиллара, дегlа текха волаш. Лакхалга диллача, 1 м. 60 см. мара веце а, дозалга диллача 80 кийла вар из. Кхыча дешашца аьлча, хила езачул, 20 кийла совгlа яр цун дегlаца. 

Цу хана дагадехар цунна совлен бола, ца эша «мухь» lобаккха. Юххьанца, гаьна ваха везаш хилча а, гlаш никъ бора, машина тlа ца ховш. «Оаха дlавугаргва хьо», - аьле, автобус е кхыйола машин соцар, бакъда наькъахо ший уйлан тlара валацар. «Сай дегlа лоlам беш ва со. Иштта аттагlа я сона», - оалар цо. Ха дlайодар, Ахьмад гlеллуш вацар. Никъ барах пайда хилацар. Ада везаш дар гlулакх. Klезиг-кlезига водаш, 50, 100, 200 метр lотlаетташ, никъ бlаьхбора. Тlаккха шиъ, кхоъ, йиъ… Ханаш яр 15-20 километр из удаш а. Юххьанца гувнаш тlагlолла удар. Веде хьалтlавоалар, тlаккха гувна кlалвоалар.Чlоагlа никъ когашта дика боацандаь, баь тlагlолла лелар. Хьалха вахара-вара, наб яра дика вацар из. Унахцlенонна дуккхача тайпара lаткъаш ма дий тlехваьнна верста хилар. Ха дlаяхарца, ший уйла, дагалаттар кхоачашду цо. Дегl хьоадара наькъаца, ца эша мухь йошаю, дулх а беза кхера мо тlера lокхосс...»

БӀарчча хьаийцача 34 шера хӀара Ӏуйрийна удаш ваьхар из. Наьсарерча пенсионни ганзе балха вола Ахьмад каст-каста гора сона Ӏуйрийна удаш воагӀаш, балха водаш автобуса чу, сайрийна цӀадоагӀаш а каст-каста вӀашагӀдетталора тхо. Миччахьа вале а, эздий, гӀулакхаца саг вар вай мехкахо. Цхьа юкъ яьлар укх шера, Ахьмад хьалха мо Ӏуйрийна удаш воацаш, бӀарга ца гуш. Хаьттача, цхьанне аьлар:

- Из, хьо маьрша, дӀаваьннав.

Тешанзар со, цо ше яьхачох, дего сахьато санна болх бора, цӀий массаза хила безача боараме дар. Из бакъдий хьажа, лаьрххӀа Наьсарерча пенсионни ганзе вахар со. Цунца къахьегаш хиннача наха бакъдир Ахьмад кхелха хилар.

ХӀанз Ӏуйрийна Сурхо тӀа е Магасе водаш хилча; сагота, цхьа хӀама эшаш, ца тоъаш санна хет.

Ца тоъар ва наькъа йистегӀолла удаш лийнна саг. Сона вовзаш, гӀалгӀашта юкъе цу тайпара физкультурникаш шиъ мара вацар: Барханой Висангирии Къоастой Ахьмади. Уж шаккха тахан шоай Ӏоажалах байнаб. Бакъда шоаш дийна болаш, кагирхошта дика масал гойташ бар уж. Физкультура унахцӀенон дӀоагӀа долга хьалхадоахар цар шоай гӀулакхашца. Цар никъ хьалъэцаргбараш кхы а дукха ба аьнна хет сона, вай къаман юкъе.

Саг валар хала хӀама да, дика а эшаш а вола саг валар шозза халагӀа да. Ший 74 шу даьннача хана, вайцара къаьстар Къоастой Ахьмад.