Таханарча вай къаман профессиональни журналисташта юкъе, воккхагIчарех ва ЦIолой Iаьлий Руслан. Цхьа бутт баьнна мара хиннавац из, вай мохк бохабаь, деррига къам арадаьккхача хана. Руслан ваь хиннав 1944 шера наджгоанцхой бетта 25 дийнахьа Мочкъий-Юрта. Кхы а кхо шу даьлча (1947), да воацаш вус из, из кхийнав Сурхо тIарча Овшанаькъан Махьмада Фасимана дезале. Казахстане из кхувш вена моттиг Алма-Атана гаьна йоацаш хиннай, Весёлая Жизнь яхача юрта дIадахад цун хозагIдола шераш. ТIехьагIо, 70-ча шерашка, космонавташта дачаш а яь, чIоагIа хоза тоаяь хиннай йоах из моттиг. 1951 шера цу юртарча ишколе деша а вахе, 1957 шерга кхаччалца Iилмай кIоаргал Iомаеш хул из. Ялх класс яьккхачул тIехьагIа цIабоагIа уж, нана Шолжа-ГIалий тIарча СМУ-3 балха яхар бахьан долаш, мехка столице нийслу кIаьнк а. Юххьанца № 19 йолча, цул тIехьагIа № 22 йолча сайранарча шахьарерча ишколашка деш цо. Цига дешаш волаш волалу из «Сердало» газета корректора гIонча волаш къахьега. ДIахо Белоруссерча къаьнарча Мозырь яхача шахьар тIа эскаре амал де вода, цIавеча юха а корректора болх бу, цхьа шу хиллал йолча хана. Иштта цох хул радио цхьан отдела заведующи. Цкъа отта велча чакх а ца ваьнна, шозлагIа М. Ломоносова цIерагIча МГУ журналистий факультете отта вода из. ХIанз ший уйла кхоачашъе аьттув а боал.