Хьехархой кхебаь саг
Дешара шу доладала дукха ха йисаяц
Ахка чакхдала гаргагӀертад. Дешара шу дӀадоладала дисараш массехк ди мара дац. Нах, бӀаргах саьрг кхийтача санна, сихбенна шоай бераш кийчдеш ба ишколе даха. Царех цхьадарашта хьалхара, вокхарна дешара тӀехьара шу хургда 2025-2026 дешара шерах. Из ха хьатӀакхоачача хана, сона массаза дагайох вай республикерча ишколашта лаьрхӀа бӀаьш хьехархой кийчбаь йола Оздой ГӀайре Фируза. Къона йолча хана денз, дешара тӀакхувш хиннача йиӀий нанас оалаш хиннад: «Са йоӀах профессор хургья». Шайхал яьлча санна, бакъ хинна дӀаэттад наьна дешаш. Цох хила а хиннаяр профессор.
Оздой Фирузас ишкол Фрунзе яьккхаяр, цул тӀехьагӀа из деша эттай доазол арахьара метташ (ингалсий мотт) Ӏомадеча факультете, из чакхъяьккхача, цо къахьийгад Нохч-ГӀалгӀай паччахьалкхен университете. Цига цунна тӀадулл бехктокхаме декхар: вайнаьха меттайи литературайи кафедранна керте оттаю из. Цо болх беча хана, дикагӀчарех цаӀ лоархӀаш яр филологически факультета из кафедра. ДӀахо цох хул цу факультета декан, филологически Ӏилмай доктор, профессор. Цо язъяьй дукха Ӏилман статьяш, диссертацеш, монографеш. Бакъда цун дерригача вахарца сона керттера хетар да, вай ишколашта эшаш бола наьна мотти литературеи, эрсий мотти литературеи хьехаш бола хьехархой цо кийчбаь хилар. Царна юкъерча цхьаболчарех шоаех хиннаб цӀихеза хьехархой, Ӏилманхой, йоазонхой, журналисташ, халкъа боахама кхыча моттигашка къахьегаш бола нах. Сона а хьийхаб цо гӀалгӀай мотт, аз дешача хана, из яр тхона наьна меттах йола лекцеш ешаш хиннар (1975-1980). Иштта из йолча деша баьгӀаб гӀорбаьнна йоазонхой хинна Гаьгенаькъан Гирихан, Угурчанаькъан Азмат-Гири, Кхоартой Мурад, царех тарра кхыбараш.
Тахан университете къаман мотт Ӏомабу; Малсаганаькъан Лидайца, Ӏоахарганаькъан Раисайца, Беканаькъан Пантайца цо яздаьча «ХӀанзара гӀалгӀай мотт» яхача книжках пайда эцаш. Магасе гӀолла лелаш, каст-каста гу сона, из яьха цӀа, лийнна урам, университет. Цар юха а юха а биц ца болийташ, сомабоах цу тамашийна дикача сагах бола дагалоацам. Ер дешара шу долалуш а бӀаьш бола цо хьийха хьехархой чубаргба тоаяьча, цӀенъяьча классашка, шоай дешархошка наьна меттала моаршал хатта а цун низ бола дош довзийта а. Сона хеташ, дагахьа баркал яхаш хургба уж шоашта хьийхача хьехархочоа. Цунна из ала доагӀа, карагӀдаьнна дика гӀулакхаш бахьан долаш.
Сурт кепа тохаш да эггара хьалха. Оздой Фирузаи сои - цхьан Ӏилман кхетаче.
