Вахарах тарадараш гойта нах
Къаман театр хьакъаьста 40 шу даьннад
Вай Сибрера цӏадаьхкача хана денз, гӏалгӏай шоай къаьстта театр хиннадацар. Нохчий а гӏалгӏай а шаккха театр цхьан тхов кӏалха а цхьа цӏи лелаеш а дар, Х. Нурадилова цӏерагӏа Нохч-Гӏалгӏай паччахьалкхен драматически театр оалар цох. Вай къаман актёраш цу хана кӏезига бар, нохчий театранна чу а боагӏаш, царца цхьана спектаклаш ловзаеш бар Цисканаькъан Мухьмади Хазанаькъан Махьмад-Гирии. Бакъда Ленинграде, Воронеже, Тбилисе дешаш хинна вай кагий нах мехкарий цӏабаьхкача, ший къаьстта гӏалгӏай тоаба хьахилар театре, лакхе цӏераш яьхараша тхьамадал а леладеш. Из а къаьстта гӏалгӏай театр дацар, керда труппа а лакхе хьоахадаьча театранна чуйоагӏаш яр.
Вай къаман актёраш къаьстта театр хьаде тоъаш бар хӏанз, цул совгӏа геттара лакха говзал йолаш, моллагӏа юхь цецваллал дика ловзаеш бар уж. Нохчий театрах хьакъаста а шоай къаман театр (гӏалгӏай) хьаде уж гӏерта а дикка ха яр. Цу гӏулакха сунт детташ яр парте обком, къаьстта цун культуран отдел, къаьст-къаьста бола гӏалгӏай. Из дош ира эттар, труппанна доал де режиссёр Беканаькъан Мустафа веча. Цхьацца дола дешаш къовсамца, гӏараца-татаца дувца дезаш хулар; юххера, чакхдаккха вӏаштӏехьдаьлар къаьстта театр хьакхоллара дош. Бакъда болх сацийта-м ха яккханзар цар. Керд-керда спектаклаш увттайора, царех яр «Къонгаш бовча хана» (Чахкенаькъан С.), «Парк» (Ибрагимбеков Р.), «Ханума» (Цагарели А.), «Ревизор» (Гоголь Н.), «Цӏий кхайк» (Боканаькъан А.), кхыяраш.
1986 шера Шолжа-Гӏалий тӏа хьадир къаьстта Гӏалгӏай паччахьалкхен драматически театр. Тӏехьагӏа Базорканькъан И. цӏи лургья цунна. Укх шера 40 шу дуз театр болх беш дола. Цу юкъа керда пьесаш увттаяьй цо Чехканаькъан С., Хамхой В., Горчханнаькъан Б., Сосаркъанаькъан Аь., Ахмадовгӏар М., кхычар йоазоний кӏийленн тӏа. Дукха керда актёраш юкъебаьхкаб цунна, хала хете а, цхьабараш къаста а къаьстаб Даьла ӏоажалах театрацара. Масала, тахан боацаш ба театра бӏоагӏий хинна артисташ: Цисканаькъан Мухьмад, Хазанаькъан Махьмад-Гири, Булгучанаькъан Хьажбикар, Новрбенаькъан Руслан, Тхостанаькъан Мурад, Къоастой Башир, кхыбараш. Цар цӏераш даимленна йисай драмтеатра истореца.
