Кулгаговзал - вахара толам
Дахчан пхьара балхаш гӀадвугаш да
Тайп-тайпарча балхашца къахьега ховш бола говзанчаш дукхагӀа мел хул, лоархӀаме да вай республиканна. ЧӀоагӀа дега тоам беш, бӀарг гӀадбугаш я ТӀой-Юрта вахача хьехархочо Беканаькъан Ильяса дахчах хьаеш йола тайп-тайпара хӀамаш. Царна юкъе я Магаса коанаӀараш, гӀалаш, моллагӀа хӀама чуйилла йиш йола кӀопилгаш, ахча Ӏоадергаш, гӀалай хьисапе яь истола тӀа лоаттаю къоаламаш, ручкаш е кхыйола хӀама чуоаттае йиш йола кхабилг, дахчах чӀоагӀа хоза хьадаь вай къаман байракха тӀа латта тамагӀа, КъорӀа е книжка дешача хана кӀалхалоаттаергаш, иштта кхыдараш.
Дуккхача шерашка ишколе математика хьехаш хьавоагӀа, вай республике маьлха сахьат хьадаь, массехк книжкан автор вола, тахан вай паччахьалкхен университете студенташта хьехаш вола Беканаькъан Ильяс чӀоагӀа чам чубенна, ше леладечунца дог ловзаш, къахьегаш ва. Цо ше белгалдечох, дукхача хана денз лаьрхӀа вар из лазера аппарат ийца, наха тахан хоза хета, вай къаман истори гойташ йола хӀамаш хьае.
Тахан дуккхача моттигашка го йиш я цо хьакхелла говза балхаш, вай республиканна тӀалаттача туристаша дӀакхухьаш, республикал арахьа бахача кхыча къаман наха совгӀата телаш, дикка яржаш латт къаман культураца, истореца бувзам бола Беканаькъан Ильяса хьаю тайп-тайпара дахчан хӀамаш.
ГӀадвугаш да, вай къаман сага балхаш лоалаха ядача республикашка дӀадайза, цар ийдеш хилар, Россе йоккхача шахьарашка бахача наьха цӀагӀа уж латтар. ДӀахойодача хана дикка ший болх шербе лаьрхӀа ва мехка цӀихеза хьехархо Беканаькъан Ильяс. Ишколе, университете хьеха а, цӀагӀа ший дега хьамсара, боча бола болх бе а аьттув боал цун тахан, ше леладер дезаш хиларах.
Ший къаман истори лоархӀаме дола Ильяс хӀара хӀаманца из гойта гӀерт. Мах баь варгвоацаш хоза кхелла болх ба дахчах яь Магаса коанаӀараш, лоаман гӀала, иштта кхыдараш. Аьттув хилба цун вай къаман лоархӀаме дола хоза балхаш доаржадеш, къаман гӀулакх лакхадоаккхаш дӀаваха! Де лерхӀараш дукха да, Даьла къахетамца, къахьегашвар гаьнавоал.
