- Керда шу даькъала хилда!

Из эггара бекъагӀа бола ловца ба, ала мегаргда. Хиннад, долаш да вай къаман хозача, низ болча дешаца кхелла ловцаш а. Царех да гӀорбаьннача гӀалгӀай поэтий дешаш. ДукхагӀа мел бараша кердача шерах шоай байт язъяьй, нонагӀъяр ловца санна а я. Тахан, кердача шерца вай мехкахой ираз хилар а ловш, царех ши байт дагалаца ловра сона, царга гӀолла хӀара фусамерча дезала ловца боаккхаш. Хьалхаръяр я Яндакъонгий Джамалдас язъяь «Керда шу» яха стихотворени. Кхыча поэтий ловцашта тара боацаш ба цо баьккха ловца. Из еррига байт ешаргьяц вай, ловца санна дека дешаш мара:

«Хьалкхета малх санна сийрлдадаьнна,

Йиза гуйре мо, дегӀах тоаденна,

Ткъама лаьча санна гӀоздаьнна,

ДоагӀа тхо диканга кхувла Керда шу.

Дежа даьтта мо сашорта волаш,

Яьнна Ӏуйре мо, дега цӀена волаш,

Ха Ӏа дӀакхухье а, хьо дега дезаш;

Хьона духьалвоагӀа со, Керда шу,

ГӀоза доагӀалда хьо, керда шу!..»

Из стихотворени чакхъялале, кхы шозза ловца боаккх поэта, «маьрша доагӀалда хьо, керда шу» аьле. Вешта аьлча, ши ловца ба байтаца. ГӀоза доагӀалда яхари, маьрша доагӀалда яхари. Керда шу гӀоза доагӀаш хилча, нахага сагото хургьяц, уж шоай дезалаша а дикача гӀулакхаша а белабеш бахаргба. Нагахьа санна из маьрша доагӀаш хуле, тӀемаш, унаш хургдац, нах боабеш хургбац, Ӏохургдац берий, истий, къоаной цӀий. Хоза ловцаш да халкъа поэта даьхараш.

Иштта хозача ловцаца белгала я Осмиев Хьамзата язъяь «Кердача шерца боаккха ловца» яха стихотворени а. Из а еррига ешаргьяц вай, цун юкъера ловца бола моттиг мара:

«Дукха лоа да дилла уллаш,

БӀарг ма кхоачча

Кисе ювргӀа боаржабаь;

Бера дог мо цӀена, яйга

Елх лай чоалпаш,

Шера аре кхостаяь...

ВӀаший ловцаш доахаш ба нах,

Са а иштта

Хьона баккха ловца ба:

«Уж Ӏолега чоалпаш миссел,

КӀезигагӀа доацаш,

ГӀоза денош хилда хьа!»

Ӏолега лай чоалпаш миссел дукха хилча, дагардаь ца валлал хургда сага вахаре гӀоза денош. ХӀаране вахаре, поэта ма аллара, дукха хилда кердача 2024 шера сийрда, ираз дола денош!