Цул дикагӀа из илли дӀаоалаш саг хезавац. Из декаш хулар Наьсарерча иллеш дӀа мел яздеча моттигашка, наха иййора дувца илли тӀадола пластинкаш, дӀаяздора магнитафонаш тӀа. Укх тӀехьарча хана, цо оалаш а е кхычо оалаш а хозаш дац из тамашийна хоза а низ бола а илли. Вай артисташ Мустафас санна хоза из шоаш дӀа ца алар кхер мотт сона... Хийла истий белхабора цо «Нана» яха илли аьле, къаьстта а дегах хьокхалуш, наьнах дола дагалоацамаш сомадоахаш дар цун тӀеххьара дешаш:

«...Ма хала ди дар из,

Ма къахьа ди дар из,

Са нана енна ди,

Лахьтан чу йилла ди!»

Вай Сибре дигале Сурхо тӀа ваьвале а, цӀадаьхкачул тӀехьагӀа из Пхьилекъонгий-Юрта ваьхав. ХӀанз а цига бах цун дезал. Духхьал иллиалархо хинна ца Ӏеш, Меданаькъан Мустафа вар йоккха говзал йола драматически актёр а. Цо дакъа лоацаш оттаяьяр халкъа театра цхьайола спектаклаш. Ше цхьаьккъа монологаш ешаш а го йиш яр из. Царех дуккхаяраш беламе а, вахаре нийслуча товш доацача хӀамашца къовсам лоаттабеш а, уж бегдоахаш а яр. Масала, цун цхьа интермеди къаракъаш мелача наьха куц-сибат, гӀулакхаш гойташ яр. Цунга хьежача кхоачам бар, саг эгӀавеш дола из малар ца молаш дита.

Къаьстта дицлуц сона цун «Каьхат» яха беламе дувцар. Вай заман кагийча наха, мехкарашта деша дезаш дар из; хӀана аьлча цар гӀалгӀай метта деш дола таржам чӀоагӀа тара да Мустафас деш хинначох. Доагорах балха вахача сага каьхат дайтад, эрсий меттала яздаь:«Ший да венна ахча да укхаза» яхача калама таржам иштта даь хиннад каьхат яздаьчо: «Отец умер, деньги есть».

Юртбоахама кхашка, фермашка концерташ ийца болхача нахаца хулар Мустафа, делкъинга цар салоӀача юкъа, царна хинна еррига балха хало дӀайоаккхар цо, ший бегашца, доахача иллешца, лекхача ашарашца. Каст-каста чувоагӀар из Наьсарен кхален газета редакце, цунца къамаьл деча юкъа самукъадаьле хулар тхо, хӀана аьлча из дӀакхаьчача моллагӀча моттиге безаме къамаьл а сакъердам а хуландаь. Паччахьалкхено а лаьрхӀавар из «Нохч-ГӀалгӀай халкъа артист» яха цӀи енна.

Кхелхав Меданаькъан Мустафа 2005-ча шера.