Масала, воккхагӀвар зӀамагӀбараша лархӀар. Царна никъ битар, царга беза мухь бале, из хьаийца дӀабахьар, хаттар дар, Ӏуйре-сайре дика ювцар. Уж-м дуккха а да, эздела чудоагӀаш. МоллагӀа ди а цунна хетадича, дукха да зе йиш йола эзделца дувзаденна гӀулакхаш. Цхьан сайрийна тхоашта гаьна йоацача урамагӀа никъ беш яр со, саготалла араяьнна. ХӀара сайрийна, пхьора ламаза ха яллалца, иштта гӀаш хьал-Ӏо йолалу со, дукха хӀама теркалде йиш я урамашка нийсъелча. Дика а во а вахара оагӀонаш белгалйоал. Цу тайпара со йодача наькъ тӀа, велосипедаш хехкаш, зӀамига бераш дар. Боад къовлабенна ха яр из. Дехьа-сехьа хьожаш, цхьацца вахара уйлаш еш, са-сайца цхьацца ханаш а дагаухаш со йодача хана, сона юхегӀолла тӀехъийккхар цхьа зӀамига бер, цхьаькха а, цул тӀехьагӀа цхьаькха а... Шоаш арабалийтарах а гӀадбаха, лелаш бар уж кӀаьнкаш. Юххера а, эггара зӀамагӀвар воагӀар ший велосипед низткъа мара дӀалалла ца могаш, ше тӀехьависарах новкъосташта эгӀазвахачох тара вар из.

Сона юхе ше кхоаччашехь, ший велосипед лаьгӀ а яь, сога аьлар цо: «Саь дик хейл хьа, даьци», — аьнна. ЧӀоагӀа сакъердаме хийтар сона из. Ше а вацар кхо-диъ шу даьнна хургволаш мара, низткъала мотт Ӏомабу ха яр-кх цун тӀахьежача, бакъда гӀалгӀай гӀулакхах керттердар-м довзаш вар. Нийса хьаювца а халехь, Ӏуйре-сайре дика ювцаш хилча, цох визза гӀалгӀа хургволга хоалуш дар. Сайна ховчох, из хьаста а хьаьста, дӀахойодаш яр со. Цу дешо уйла яйтар сога, мел хоза да ший къаман Ӏадат, вай къаман эзделга кхоачаргдолаш хӀама цахилар, бера багара боагӀача хана ший къаман мотт боча хилар, из деррига са керта чу дар. ЧӀоагӀа безам хилар са, цу кӀаьнкаца кхы дӀахо а къамаьл де. Са виӀий-бераш а дар цун ханнара. Фуд хаттар деча деша керттера маӀан? МалагӀа кхетам ба, из селлара зӀамига волаш, цунна беннар? Уж хаттараш увттар сона хьалхашка.

ТӀаккха аз лаьрхӀар, юхавоагӀаш из соца а ваь, цунца сай къамаьл хотталой хьажа. Цхьан купан го а баьккха, со юхайоагӀаш, хӀаьта мо сона духьалвоагӀар из кӀаьнк.

— Сабардел, нанилг, — аьнна, соцавир аз из. — Хьан Ӏомаваьв хьо Ӏуйре-сайре дика ювца? — аьнна, хаьттар аз.

— Со сага а Ӏомаваьвац, са воккхагӀволча вошас тхацига хьа мел веначунга ювц из, тӀаккха са а безам ба из ювца, цунах тара хила гӀерт со, сона дукха веза сай воша. Кхы а тха папас а оал иштта, тхацига саг веча. ТӀаккха со а ма вий хӀанз воккха, цудухьа ийцай сона ер велосипед а, — аьнна, геттара паргӀата къамаьл деш вар кӀаьнк. Дукха хӀама дагадохийтар цу дешаша. ХӀанз зӀамига волаш, цунна дӀаденнар цо леладергда кхоана. ТӀаккха, цох зӀамсаг хинна ваьлча, гӀалгӀай сий а лорадергда, къаман эздел а леладергда, ше ваьнна моттиг а йовзаш хургва. Дас-нанас хьалхадаьккхар да кхоана тӀехьено хьалъэцаргдар. ЦӀенъюкъера хьадоагӀа из дукхагӀча даькъе. Да-нана барт болаш дахе, цар шоай дезала хьалхашка хоарцо йола, айхьаза оагӀонаш гойташ ца хуле, кӀаьда а безаме а хьалкхувргья цар тӀехье. Оалаш да-кх вай: «Хургдола хьазилг бӀенара Ӏах», — аьле. Из санна, ше хургвар-м зӀамига волча хана денз а, белгала хул. Дика кхетам луш дола да-нана вайна ма эшалда, ишттача тӀехьено лоаттаду тахан вай мехка сий.