1982 шу дар мотташ ва со из. Шолжа-ГӀалий тӀа арадувлача «Сердало» газете балха вахар со, 24 шу даланза зӀамига саг вар со цу хана. Ши кабинет мара юкъе йоацаш, цу редакце юртбоахама отдела кулгалхо волаш, болх беш вар Руслана да Ювсапа Султан-Хьамид. Цун къонгаш советски эскара бӀухой ба яхарал совгӀа, царех ховш ер ма дий ала хӀама дацар сона а дуккхача гӀалгӀашта а.

Са кабинет керттерча редактореи цун заместителеи приемнена духьала яр. Цу хана керттера редактор Тебой Тухан, цун заместитель Хамхой Мустафа вар. Цхьан дийнахьа ниӀ дӀайийлла, чуийнна йоазув деш вагӀар со. Керда газеташ секретаршайга дӀаделар, редакце почта кхухьачо. Уж эггара хьалха Мусе Мустафа волча чукхухьар. Дукха ха ялале, ший кабинетера араийккха, Султан-Хьамид волчахьа хьалведар Мустафа, бедоаллаш, «Известия» яха газет а долаш. ГӀадвахара оазаца юртбоахама отдела кулгалхочунга чӀоагӀа къамаьл деш вар редактора заместитель. Сона а кхычарна а меттадар, уж шоай балха хьакъехьа къамаьл деш ба. Бакъда, дукха ха ялале, редакцерча берригача болхлой кулгех чакхдаьлар «Комбат Аушев» яха йоазув тӀадола центральни газет, цу тӀа дар аьшка каска туллаш волча Руслана сурт. Цул тӀехьагӀа гӀалгӀашта юкъе гӀоръяла йолаелар къонача эпсара цӀи. Дукха ца говш цунна беннача турпала дошо седкъо, кхы цӀаккха йицлургйоацаш, дӀаязйир цун цӀи гӀалгӀай къаман а советски мехка исторен а чухьа. Иштта вайзар сона тхоашца болх беш волча сага воӀ, цо гойта денал а майрал а.

Из ваьча денца даькъала вувцаш, цун вахарера цхьайола моттигаш дагалаца лов сона. Овшанаькъан Султан-Хьамида Руслан ваь хиннав, 1954 шера ардара бетта 29-ча дийнахьа. Кокчетавски областа Айртауски кхален Володарское яхача юрта. Вай Сибрера цӀадаьхкачул тӀехьагӀа цар дезал дукхагӀа баьха моттиг яр Шолжа-ГӀалан Старопромысловски кхален Катаяма. Цига яьккхай цо юкъера ишкол а. Цул тӀехьагӀа, ше ишкол яьккхача 1971 шера эскаре амал де вода. ДӀахо цо деш Буро тӀарча Советски Союза маршала А. И. Ерёменко цӀерагӀча лакхерча юкъара командни шозза ЦӀе байракх лелаеча тӀема училище. Болх бу Къилбаседа Кавказа тӀема куран тӀа, взвода а ротан а командир волаш. 1979-1980 шерашка батальона штаба кулгалхо хиннав вай мехкахо. 1980-1982, 1985-1987 шерашка Афганистане интернациональни декхар кхоачашдеш хиннав майралца белгалваьнна эпсар. Цу хьалхарча шерашка, елар цунна Советски Союза Турпала цӀи.

Цигара цӀавеча из дешаш хиннав М. В. Фрунзе цӀерагӀча тӀема академе. Болх баьб афганистане хиннача бӀухой СССР комитета керте латташ, цу тайпарча балха тӀа хиннав СНГ мехкашка. Овшанаькъан Руслана енна хиннай ЦӀеча Седкъан орден, Ленина орден.

1993–2001 шерашка Овшанаькъан Руслан ГӀалгӀай Республикан хьалхара президент хиннав.

Карарча хана вахаш мехка столице Москве ва вай инарал. Ираз долаш, гӀоза из ваьхача дика хет дуккхача шерашка.