Тахан цхьан кулга пIелгашца дагарбе йиш я каьхата пандар лакха ховш бола нах. Йовлой Рая дIаяьнначул тIехьагIа, пандар лакхарца белгалбаьнна ба вай республике Инаркъанаькъан Мадина, Къоастой Микаил, Беканаькъан Хади, Тимарзанаькъан Iалихан. ТIеххьарчун укх деношка 65 шу дизад.

Iалихан а цар дезал а сона бовз зIамига волча хана денз, дагавоагIа цун да Iалаудин, нана Либи. Дезале ялх бер дале а, Наьсарерча заводской оагIорахьарча берашта дикагIа вовзаш хиннар Iалихан вар, хIана аьлча цо уж гIаьле оза, къаракъ мала Iомабацар, канала йисте, зиза техача кIарсхалашта кIалха, сийнача баь тIа ший ханара бераш гул а дийя, царна юкъе каьхата пандар локхаш, цар самукъадоаккхаш вагIаш го йиш яр из хийла. Цу хана а кхетаде хала дацар, воккха хилча Iалиханах дика пандарча хургволга. Иштта хила а хилар из. Наьсарерча ашарий ишколе а дийша, цул тIехьагIа цхьацца халхара тоабашка болх а баь, арахьа дIаваха дикка ха яьккхай вай мехкахочо. Республика хьаяьчул тIехьагIа цIа а вена, ГIалгIай паччахьалкхен халхара ансамбле болх беш, хьавоагIа из. Цунца дуккхача мехкашка хиннав из вайцига а доазол арахьа а. Цун йоккха говзал зийнай наха санна, паччахьалкхен болхлоша а. Цунна тешал деш я 2002-ча шера енна «Искусствай гIорваьнна болхло» яха цIи. Цул тIехьагIа, 2009-ча шера цунна еннай «ГIалгIай республикан гIорваьнна артист» яха цIи. ХIаьта 2013 шера «ГIалгIай республикан халкъа артист хул» цох. Iалихана ашархочун говзал хестаеш яр тахан вайна юкъе йоаца Йовлой Рая, иштта из дика яйза, цунца дуккхача шахьарашка гастролашка хинна ва паччахьалкхен ансамбла исбахьален кулгалхо Гадаборшанаькъан Iийса, кхыбараш.

Дика артист хинна ца Iеш, Iалиханеи цун фусам-нанас ТIоаршхой Раисханеи хьалкхебаьб къонгаш Беслани Рустами, йоI Залина.

Iалихан дика вовзаш ва вай культуран болхлошта юкъе. 1996 шера дар из, цу хана со болх беш вар Наьсарен-Кхалерча «Наьсарен оаз» яхача газете. Республике дика вовзаш вола художник Доврбиканаькъан Башир болх беш волча искусствай ишколе чуваха вагIаш, Башира хьахьекхар сога цIихезача наьха сурташ дийхка альбом.

Царна юкъе дар Тимарзанаькъан Iалихана сурт а. Цунгара дийха а дийха, моттигерча газета оагIонаш тIа кепа техар аз. Таханарча денга кхаччалца, из сурт лорадеш леладаьд аз. Ткъаь ворхI шу да из сога кхаьча, Iалихана 65 шу дизача хана, цунна юха а кепа техача бакъахьа хет сона. Цул совгIа, Iалихана вахар даим атта а ираз долаш хилар а лов.