Сагага хьежжа хул из ваха моттиг
БӀарг гӀадбугаш, дог хьоасташ хӀама я-кх цӀенал
Вайна юкъе массахана оалаш хьаденад-кх, малайк цӀенача моттиге мара сацац яха дош. ЗӀамигачун а воккхачун а дог хьоасташ хӀама лоархӀ гонахьа цӀена, хоза хиларах. Бера хана денз, нанас хьалхадоахар тхона, сага юхь дӀагойт из вахача моттига хьало; из цӀаккха диц ма делаш, яхаш. ХӀаьта тахан, каст-каста се дӀа-юха ухача урам тӀа айса теркалдаьча суртах язде безам хилар са… Шахьара, юртий урамашка гӀолла дехьадувлаш, гонахьара сурт зув вай массахана. Бе-бе да наьха вахара хьалаш; оамалаш, нигаташ, уйлаш санна. Бакъда, моллагӀча сага цхьа ший тайпара бӀарг хьоасташ, дега йӀовхал луш да аьнна хет цхьа хоза лостам болаш, цӀендаь латта урамаш, наьха наӀартӀенаш. Тахан-м наьха вахара хьал а дикка тоаденнад ала мегаргдолаш да. Боахамаш а, наӀартӀенаш а, ковнаш а хьалха хиннараш доацилга гу вайна.
ШакӀа санна йола Ӏоакъаш Ӏойийтта, тайп-тайпара гаьнаш, зизаш дӀадийна; лакха, геттара хьувзаеш, говза болх беш яь дукха мах бола коанаӀараш оттаяь; кхыметтел урама цӀи мишта я хойташ хьалтеха дола улг а тӀехьа дошоца кхаьлача санна къаьга, хоза догам дуллаш тоадаь долаш; хоза лампаш, фонараш егӀа я наьха наӀартӀенаш тахан.
Иштта тӀехъяьнна тоаяьеце а, йоархӀаш, нувхаш дӀаяьха; хоза цӀена лоаттаеча коанаӀартӀено хьагойт, цу коа баха нах лостам безаш, цӀено лораеш болга; бакъда, цу дерригнена юкъе массахана кегаенна латтача моттигаша берригача урама куц толхадеш санна хеталу. Ма дарра аьлча, цхьа чӀоагӀа бӀарг гӀадбигар-кх са каст-каста се нийслуш хиннача урама хувцаденнача сурто. Хоза тоаяь латтача гонахьарча моттигашта юкъе массахана цхьа бос байна хиларах маьлхаро хеташ хинна наӀартӀе, хӀаман хьисап дараша шоллагӀа вахар денна къаьга, сийрдаяьнна хьахьежаш яр; хьажал, хӀанз со мишта хоза я, яхаш санна.
Сов чӀоагӀа тӀера басар бесаздаьнна, маьлхо, догӀо чӀормаяьха цӀе я е боарха я къоасталуш ца хинна коанаӀараш, лила мо сийна басар теха, лакхе гӀолла егӀача чӀовгашта дошох тара борза хьекха, нускал санна тоаяь дӀаоттаяьяр. Карт мелий Ӏойодаш йолча, хьахетаргахьа, ше йоаккхача хана куц хувцар ца дайнача газа турбах а иштта сийна басар хьекхадар. Гуйрангара Ӏанга йоалаш, тӀаккха юха бӀаьстан баьццара денош хьаэттача а иштта йокъаеле, карт мел я урагӀъягӀаш хинна йокъаенна чӀегӀаш, саг миссел лакха йоархӀаш хинна моттиг йоацаш дӀаяьннаяр.
Нувхех цхьа хӀама доацаш, цӀена лаьтта, латтар Ӏан ха яле а, юкъ-юкъе аралелхача бӀайхача маьлхо низ бенна аракъадаш латта баьццара бай бар цига хӀанз хьагуш. Дикка къахьегаш яьлга гуш яр демий ювргӀа тӀаилла карт, хӀаьта карта кӀалха бетонаца гом биллабар. Тахан латтар Ӏан бутт бале а, дӀайха, малх хьежа ди хержа, из беррига болх чакхбаьккхабар кӀалха баьхараш дӀабаха, из фусам ийца хьачубаьхкараша. Ший нанна уллув дӀаэтта, карта юхе даьда кхертӀой хьагулдеш, кӀоагаш доахкача вордингашца дӀакхухьаш, Ӏочудехкаш; воаллар итт шерга кхаьча хила мега кӀаьнк.
Ма хоза ба-кх хьо лостам, цӀенонга кхоачаргдолаш хӀама дац-кх, аьнна, хийтар сона. БӀаьхача урама куц доадеш хинна моттиг, тахан малх мо къоагаяь дӀаоттайир хозал яха дош довзараша… Духхьал бӀарахьежача а дега тоам хулаш, хоза хувцам бар-кх из. Вай урамашка каст-каста го йиш я иштта дола хӀама. ЧӀоагӀа тамашийна хеталу, гуйрахьа лийга гӀаьнаш михо урам мел ба хьал-Ӏо кхухьаш, нувхаш хинна дадаш.
ХӀара денна арабувлаш, шоай коанаӀартӀе цӀена лоаттае гӀертараш а паргӀата битац цу моча хӀамо, хӀана аьлча, хье ваха моттиг дика цӀенъяь хьо дӀачуводдашехь, ши цӀа эгӀа бахарий наӀарга мел яда гӀаьнех хьахинна нувхаш михо хьа наӀарга хьалъяхь, чӀоагӀа чам боацаш сурт хул цох тӀаккха, нах эгӀазкхувл цу мо долча хӀамо. Ӏалам Дала вайна хьаденна доккха совгӀат да! ХӀара хӀаманна доал эш, безамца кулг тохаш леладери талмаста дитари хоалуш хул, дӀатӀахьожжашехь. Лостам лелабар, Дала хьаденначун хам бар да яьхад вай хьаькъалеча даьша, хӀаьта уж дешаш мел доагӀаш аьнна да вайна бӀаргагу тахан!
