БӀаьстан ха хьаоттарца, гаьнаш йохкаш йолча моттигашка уж эца баьхкарий йӀаьха тӀӀирг хьаотт. Дикка зийча хоалу, сом латаш йолча гаьнел дукхагӀа, духхьал хозала йоагӀаю гаьнаш наха хержилга. Сагах бехк баккха йиш йолаш хӀама дац из, бакъда, дег чу Ӏочухьежача, цхьа новкъо-м хул, Дала хьаденна хоза беркат телаш йола га ца эцаш, ма даггара куцала йоагӀаеча гаьнашта тӀа хӀана бетталу нах, аьле.

Бохча чура тӀеххьара сом Ӏодехкаш, декхарийла ухаш, наха уж ийеш гу сона. Доккхий ковнаш дараш-м вӀалла биза а кхетац цу гӀулакхах. Дунен уйла е эттача, са хьаькъала цхьа тамашийна хет из хӀама... Аьъ, сом луча гаьнал доккхагӀа беркат хила йиш йий?! Вай Кхеллача Дала къахетам баь, вайна хьаденна дика деций из?.. Цхьан хана хинна сомий гаьнаш-м, дӀаегӀа массехк шу даьлча мара сомлуш хилацар, хӀаьта тахан-м вайна хьаяьржай, дӀаегӀача шера сом луш йола, вӀалла йоккха моттиг дӀалоацаш йоаца гаьнаш. Тамашийна хӀама дар сона дайнар, цхьа лохига, йоккха йоацача гаьн тӀа из хьалйизза Ӏажаш боахкар. Га ма зӀамига а я, цу тӀа Дала хьахилийта беркат ма дукха а да, аьнна, хийтар сона. Сибрера цӀаенача шера, сай даь-нанас дӀаегӀа кӀайча комара гаьнаш духьалъэттар сона... Уйла е эттача, бийца ца валлал болча дукхача нахага кхаьчад цу шин гаьна беркат. Со яхача ураме дахаш мел хинна бераш дӀаьхача ахканна цу гаьнаш тӀа доахкар, комараш юаш. Йоккхий, кӀай комараш латаш, геттара лакха ши га я уж. Меттара гӀаттарца, цар гаьнаш тӀа даьле, бӀарчча ди уж комараш юаш, царна кӀалха Ӏийне дагӀаш, дӀакхухь дуккхача бераша. Хийла, унахочун догьэтте, цу тӀара йоахаш комараш кхихьай. Уйла ю аз, уж ши га дӀаегӀа саг Даьла кхеле дӀайийрза дукха ха я, хӀаьта са даь-веший коа, цо дӀаегӀа гаьнаш тахан а наха беркат эцаш ягӀаш я. Цул доккхагӀа сагӀа мишта хургда, аьнна, хет сона... Саг дӀаваьлча а, лелаш дола сагӀа оал цох вай дино. ХӀара сага цу тӀара беркат мел кхоаллача хана, уж сагӀийна дӀаегӀача сага маьл хул.

Хоастам ба-кх вай АллахӀа! Куцала йоагӀаеш йолча, сом латаш йоацача цу гаьнех ший кови, коанаӀартӀеи хьалйизай сона йовзача цхьан кхалсага. ЙоггӀал йогӀаш хилча, хозал а, Ӏи а, шортта сом а луш йола гаьнаш йогӀа мегаций Ӏа, хьайна тӀера сагӀийна Ӏа дӀаегӀача, цу тӀара беркат сага мел кхоаллача хана маьл хургбар хьона, аз аьлча, езацар уж-м, сомаш базар тӀа болаш ба, безачоа хьаэца, аьлар цо.

Хьалха дӀаяхача хана, вай хьаькъалеча даьша чӀоагӀа леладаьд из гӀулакх. Юхе гӀолла тӀехваьнна дӀаводача сага хьатӀавена сом боаккхаргбола га дӀайогӀаш хиннай цар, лаьрххӀа карта йистерча наькъа оагӀонца, картал арахьа, шоаш бахача урам тӀа. Цар кхетадаьд, тахан шоаш дӀадийнар кхоана маьл хинна юхадоагӀаргдолга. Куцала йоагӀаю гаьнаш а хоза я, бакъда сом луча гаьнага хӀама кхоачаргдац. Ӏаж, хьач, кхор, боал, шапша ягӀача бешах цхьа бокъонца йола ганз хет сона-м! Тхоца балха хиннача кхалсага хӀара Ӏуйран, ший бешара яьхача шапшех биззе тӀормиг бахьар тхона.

Базар тӀа йохкарашта тара йоацаш, оаха болх беш хинна еррига кабинет шоай хозача хьажах хьалъюзаш, ма башха сом бар-кх хьона из! Аз, аргӀа оттаяь, хӀаранена цхьацца тӀормиг буззаш шапша кхухьаргья шоана хӀара дийнахьа, шоашта варени ергья оаш, аьлар цо. Иззал дукха шапша цхьан гаьн тӀа хьалатарах ма чӀоагӀа тамаш йора аз! Даьла низ ба-кх из! Хоза хургдеций, хӀара сага, ший валар дагадеха, шийна тӀера сагӀийна сомий га дӀайогӀаш хилча?.. Вай массане хьаллаца дезаш, беркате гӀулакх да из, тхьовра вай даьша леладаь.

Хоза га хоза я, бакъда хоза хиларал совгӀа, кхы а беркат луш хилар цул а дикагӀа да! АллахӀа гӀо долда вайна дикача хӀаман тӀехьа!