Берий театри ишколи
Теникашца болх бечар дунен халкъашта юкъера ди
Берий театри ишколи вӀаший айхха бувзам болаш ши моттиг я. Цун фаьлгашка, пьесашка хьажа ухараш цига дешаш бола кӀаьнкаши йиӀигаши ба. Цудухьа айса болх беча ишколе музей е волалуш, аз лаьрхӀар эггара хьалха цу чу театрий афишашта лаьрхӀа кхо оагӀув бола тумба оттае. Царех цхьа оагӀув дӀаеннаяр хьалха теникий театр оалаш хиннача, хӀанз берий театр оалача культболхлоша къахьегача моттига. ЛаьрххӀа цу театре вахар со, цигара афишаш яр духьа. Лоацца вӀашагӀкхетар хилар Хазанаькъан Мусайца а кхыболча театра болхлошца а.
Кхаь тайпара афишаш ера аз, дешархошта берий театр довзийтар духьа. Уж дӀатӀалотайир музее латтача тумбанна. Цу хана денз, вай республикера берий театр довзаш ба тха дешархой. Из тумба хӀанз а йолаш я, цу тӀара гу Гайсултанов Ӏумара йоазох пайда эцаш оттабаь фаьлг, Г. Ландау «Машаи чаи» фаьлг, А. Адреваа «Чуче», М. Супонина яха фаьлг-ловзар «Бука». Дуккхача наха къахьийга оттадаьдар уж фаьлгаш, масала, цар режиссёраш-оттадаьраш бар П. Козец, Я. Делаев; суртанчаш — Марзбиканаькъан Б., Гаджиев С., Ярыжанаькъан Р.; ашарашца гӀо даьраш — Ӏарчакханаькъан М., Шерипов Э., кхыбараш. Цу заман чухь театра керттера режиссёр ГӀалгӀай Республикан халкъа артистка Малсаганаькъан Роза яр. Из дуккхача шерашка теникий театре болх баь, из гӀулакх дика довзаш саг яр.
Бераш театре дӀаухаш санна, театр а доагӀаш хулар ишколе хьоашалгӀа. Цкъа иштта «Цогала кӀориг — оапишк» яха РФ гӀорваьннача артиста Домбровский В. оттабаь фаьлг бахьаш баьхкар уж. Аз царна хьалхаваьнна лела саг чувигар музее, дӀахьекхар берий театра хетадаь оахош даь балхаш. Цо цхьаькха а афиша елар музейна совгӀата, из я лакхе хьоахабаь фаьлг а из оттабаь режиссёр а, ашарашца из хозбаь Борисовская Л. йовзийташ.
Теникий театре болх баь нах сона хьалха а бовзар. Масала, 1967 — 1973 шерашка, вешта аьлча, ялх шера Шолжа-ГӀалий тӀарча республикански теникий театра директор хиннача сагаца, пен мара юкъе боацаш, кхаь шера болх баьб аз, цун кулгалца. Абаьданаькъан Бек цхьан хана теникий театре директор хиннавар, хӀанз из «Сердало» газета культуран отдела керте латтар, хӀаьта со цун отделера корреспондент вар. Бек ше а вар берашта цхьацца хӀамаш яздеш. Сона бовзар Ховтанаькъан йижарий, уж цхьан хана Наьсарерча № 1 йолча юкъерча ишколе деша багӀар, цига 10 шера деша ваьгӀав со а. Иштта дувцаш хезад сона, вай цӀихеза вола иллиалархо Имагожанаькъан Осман а ший къахьегама юхьиг дӀайолаеш, теникий театре балха хиннав, аьнна. Дукха дика артисташ хиннаб цига балха. Цар оттаяьй тайп-тайпара Чахкинаькъан СаӀида («Зураб цхьан хӀамах ма кхера»), В. Маслова («Али-бабаи шовзткъа гӀаьрхои»), Янданаькъан Ж. («ТӀеххьара гусар»), Абаьданаькъан Бека («ЭгӀаяь бийса»), Пушкин А. («Чкъарахочохи чкъаьрахи») пьесаш а фаьлгаш а. Йоккхача Россе городашка гӀолла гастролашка хиннаб уж.
Вай республике хьадаьхке а хул арахьара берий театраш. Уж вай юрташкарча ишколашка шоай говзал гойташ чакхдоал. Теникий театрай, берий мел долча театрай болхлой даькъалабувца лов цар дезача денца.
