Иллиалархочун аргӀанара совгӀаташ
Ужахьанаькъан тайпанна хетадаь книжка
МагӀалбика кхале вах гӀалгӀай гӀорваьнна артист-иллиалархо Ужахьанаькъан Мухьмад. Из дика дагавоагӀа, цун иллешка ладийгӀача, 80-ча шерашка Шолжа-ГӀалий тӀа баьхача наха. Дикка ха я Мухьмада керда иллеш ца хоза, бакъда цо дӀааьннача къаьнарча иллеша а боккха салоӀам бу, царга ладувгӀаш волча сага. Ше Наьсаре веча, «Сердало» газета редакце чуэтте, цун журналисташ фу деш ба хьеже, царна е блокнот е къоалам беле, совгӀат дийя дӀавода из. Укх наькъа цо журналисташта дайтад ше Коазой Нурдинаца цхьана оттадаь, кепа теха арадаьккха «Ужахьанаькъан тайп ГӀалгӀайчен исторен чухьа» яха книжка. Боккха къахьегам ба 534 оагӀонах латташ бола из болх.
Лоаман ширача Аьга-Кхалара хьадаьнна Ужахьанаькъан тайп къаьнагӀчарех цаӀ да. Къаман вахара юкъе доккха дакъа юкъедихьад цунах хьабаьннача къонахаша а кхалнаха а. Кхоачам болаш да аьнна хет сона, цун цхьабола викалаш дагабехача. Масала, гӀалгӀай эггара хьалхара алапат, грамматика, газет, дошлорг, драматурги хьакхелла волча Малсаганаькъан Кураза Зоврбика нана Ужахьанаькъан Лоли яхаш хиннай. Хетаргахьа, цунгарча хьаькъала тароний цхьа дакъа кхаьча хиннад воӀага, хӀана аьлча даь-наьна ехьага хьежжа хул цар тӀехьенаш а. Вайна массанена вовзаш ва, Сийлахь-боккхача Даьймехка тӀема хана, Нохч-ГӀалгӀайчен дошлой 225-ча полка командир хинна Абаьданаькъан Японца, цун фусам-нана хиннай Ужахьанаькъан Мустбе Маржан, эггара хьалхарча Россе Турпала, гӀорваьннача лётчика, инарала Осканаькъан Сулумбика фусам-нана Ужахьанаькъан Салмана йоӀ Раиса хиннай. Цу наьха цӀераш кхы а дукха яха йиш яр.
Къаьстта Наьсарен кхале баха Ужахьанаькъан чӀоагӀа накъабаьннаб моттигерча наха. Царна юкъе бар лораш, хьехархой, йоазонхой, тайп-тайпарча предприятей кулгалхой. Масала, Наьсаре а ерригача республике а дика вовзаш вар лор хинна Ужахьанаькъан Къамбулат, вай республика хьаяьчул тӀехьагӀа унахцӀенон министр а хилар цох. Наьсарерча №13 йолча ишкола-интерната директор, райОНО, АТП кулгалхо хилар тайп-тайпарча ханашка Ужахьанаькъан Расухана Ӏамархан, Наьсарерча мельзавода кулгал деш хилар Ужахьанаькъан Беслан, хӀаьта лор Ужахьанаькъан Яхььяй Софья ца йовзаш саг-м Наьсарен кхале хуле тамаш я. Соца цхьан классе деша баьгӀаб Ужахьанаькъан тайпан нах, царех вар вай республикан берий футбола командан наӀараш лораеш хинна Беслана Мухьмад, цо дакъа лаьцадар «ТӀоарска бургац» яхача мехка яхьашка, цо а цун новкъосташа а толашагӀа йола моттигаш йоахаш а нийслора. Иштта соца цхьана дешаш яр министр хиннача Къамбулата зӀамагӀа йола йиша Радима. Тамашийна сабаре а эздий а саг яр из.
Мухьмада журналисташта совгӀата дайтача книжка тӀа да дукха сурташ, царех дола йоазош. Хетаргахьа, из оттадаь саг цхьаккха ший тайпан саг виц ца ве гӀийртав, аьнна, хеталу; из книжка дешача хана. Цунга хьожача юкъа дукха хӀама довз, духхьал цхьан тайпах дайза ца Ӏеш, бӀарччача гӀалгӀай къаман исторех а таханарча вахарах а.
