Хьай машенага хьажа
Хьай рузкъа хьаьнал хилар дезе, Даьла раьза хургволча тайпара лелабе нахацара лерхIам
Iан денош хьакхаьчар шоашца шелал яхьаш. Гуйран бетташца болалу бахархой тIадоагIача гIорадаьча деношта духьала отта кийчо е. Къаьстта чIоагIа из хIама теркал ду газелешца, автобусашца гаьна ядача юрташкара бувлаш, пхьешка балха дIаухача наха. Шоаш болх беш мел йоаккха ха нах мерзача набарах боахкача хана, тIехьа бисар кхераш, хьалххе новкъа баьлий Iоувтташ йоахача наха дика кхетадергда аз дувцар. ТIоараш тоха а мег цар из дуккхача наьха са лаьца гIулакх аз хьоахадаь.
Массала, Назрань яхача пхьен гаьна улача юртара ваьнна нийсса бархI сахьат даьлча ший болх-моттиге вагIаш хила веза саг хьалххе аравоал новкъа. ГIорадаь Iан денош латтача хана дукха ха йоаккхаш остановке латтар хала хIама да, хала хиларал совгIа, дегIа могашал эшаеннача наха геттара кхераме да дегIо шелал чу яар.
Бакъда, мелла бIайха гIирс бийха кийчвенна мара ца хиларах, цу чу сов шийла хиларах хьай кара хIама доацаш хьо гергвеш хул дукхагIа йола вай наькъашка лела газелеш. Нахаца лерхIам лелабеча саго-м Iан шелал хьа тIа отталехьа пишко мишта болх бу хьажий, хувца езе, хийций, чу кулг техий кийчъю ший машен. Иштта хила а деза из-м! Нах дIа-хьа кхувлаш, царгара хьаийдеча ахчах ший цIагIа сискал чукхухьаш лелаций из?!
Ше дуар хьаьнал хургдолчча тайпара бе беза болх бусалба саго. Иштта ца хилча Дала беркат даь дIагIоргвац-кх из... Ала деза, дукхагIа йола газелеш духхьал цу чархаша дIалелаяр мара кхы хIама гунахьа доацаш я-кх ер аьле хеташ хул. Чу пишк йоацаш, цул совгIа, хьоггехьа ше дуаргдар диъа яьннача наIарах, массе корех шийла Iан мух чухьекхаш гергбалий багIаш дIакхоач нах. Ма ираз дар-кх укх тIара сихагIа Iовоссар яздий хул йовхьамаш тIа. Ер-м цхьа цIаьхха дагадеха хIама дац, дIаьхача шерашка дIа-хьа ухаш хIара денна зувш гIулакх да.
Хиннар дувц аз шоана. Ена хьатIаэттар газель. Шелбенна нах сихбенна чухайшар. БархI сахьат даьлча балха хила безаш сиха ба чухайшараш. Газелий кораш ша баь да арара хIама бIарга ца гуш. Ший машен йовзаш тулуп йийха, кхакха кий тилла кийчвеннав машен лоаллаш вагIар. Хеталу....со вIайха хилча шо тIехьашка дагIарех-м хур хургдар аьнна араваьннав ер аьле. Газелиста юхе хьачухайнача цун новкъосто йоах, туха берхIа хьакха безар Iа укх корашта гIора дерг доацаш. ТIехьашка ягIа кхалсаг йист хилар тIаккха раьза йоаццашо:
«Корашта-м туха берхIа ма хьокхий оаш, укх чу багIача наха фу ду оаш?!»..... Шаккъе юхахьежа, малагIа яр из аьннар, хьан тайпан я хьо йоах цар. Ма чIоагIа ала ловра-кх сона, из аьннар малув хьажа ца а гIерташ, кIеззига нахах эхь-бехк хийтте хьай машена чу пишк йолла, мух чубетташ латта ниI тоае.
Эхь дац из?! Ма дукхача наьха са хьовзадаь, балийна даьнна хIама да из! Хьай машенаш тиша хиларах, шийла хиларах ах маьха мича кхувл Iа нах, бизза мах дIаийбеш кIала ца висар чуховрг воацача машенаца хьайна напагI доаккхаш лелаций хьо?! Уйла е-м еза тIаккха, Дала хьаьнал дергдий — хьогI сона иштта доаккха рузкъа аьнна. Биззача маьхах Iайха нах дIа-хьа кхувле, цу чу йолла езача пишках дала дезар юха ма увза! Цхьаволча саго ший тIорме чура хьал баьккхий гIайбилг Iобул ше Iоховча гIанда тIа.
ГIорадаь латтача цу гIандаш тIа вагIаш дIакхаьчачоа доаца лазар тIадаргдолаш хул хьал. Аз-м тамаш ю, вIалла а тIахьожаш саг вац хьо-гI цу машенаш та аьле. Цхьа нах, цхьа организаци бехктокхаме йолаш лела езаш яц-хьогI уж машенаш... Бусалба нах шоайла лерхIам болаш хила безаций... Шоайла вIашка теIаш бохьлуш багIаш хул... Даьла раьза хургволча тайпара даха хьажа вай дерригаш!
