Мехкада: ӏарамхерча ӏилман ишколо ӏилманхой кхебеш гӏо дергда
Ардара бетта 25-ча денгара 31-ча денга кхаччалца, Жӏайрахьа кхалерча ӏарамхе Къилбаседа Кавказа ӏилман-математически ишкол хургья. Вай мехкарча, иштта Россе моттигашкарча лакхерча классашка дешарашта лаьрхӏа йола из проект хӏанз кхозлагӏа дӏахьош я вай мехка. Дешархошта дикка баьржа, ӏомадаьр тохкама балхашца чӏоагӏде аьттув луш болх ба из.
«Программан юкъе да тайп-тайпара дола декхараш, физически тохкамаш, тоабанцара ӏилман проекташ. Из болх дӏахьоргбараш ба профессораш, ӏилман гӏулакхех йолча Российски академе доакъашхой- корреспонденташ, Москверча физико-технически института хьехархой. Берашта физикацара, математикацара шоай кхетам чӏоагӏбе, мехка цӏихезача вузашкара кхаьчача хьехархошца, ӏилманхошца болх дӏабахьа, тохкама хьалхарча балхашка гӏолла дукха хӏама довза, иштта дӏахо дешаргдола оагӏув хьахаржа аьттув луш да из гӏулакх», - яздир ший телеграм-оагӏон тӏа вай мехкадас Келаматанаькъан Махьмуд-Ӏаьлас.
Республикан кулгалхочо теркал ма дарра, из дешара проект йоаржаяр начӏал долча вай берашта боккха пайда луш да. Дешархошта беркатегӏа хургбола никъ хьалаца дикка гӏо деш ба тахан мехка. Мехкадас теркалдир, ишттача проекташка гӏолла, вай къонача тӏехьенна технологически, инженерни, ӏилман-тохкама оагӏонцара гӏулакхаш дезалургхилар.
