Даьймохк лорабеш латтарий берашта лаьрхӏа хьаькъала яхь дӏайихьар мехка
СВО ветераний, тӏема аренашка вахар хаьдача бӏухой берашта лаьрхӏа хьаькъала яхь дӏайихьар мехкарча «Даьхен лорабой» яхача филиала болхлоша. Кхетама хьал довзийтача яхьашта юкъе дар Россе исторецара, бокъонашцара, культурацара, ӏадаташцара хаттараш. Къаьстта терко еш бар Сийлахь-боккхача Даьймехка тӏема, тӏема операцена, иштта вай мехкарча Россе Турпалий исторена. Ганза филиала болхло йола Налганаькъан Танзила яр автор хинна хьалхаэттар.
«Лакхе белгалдаьраш дикка довза дезаш хиларал совгӏа, тоабанца болх бе, ха кӏезига йолча хана геттара кадай хьовза ха дезаш дар бераш. Тӏахьожаш хиннарашта юкъе бар ветераний Союза, Тӏема-вахара моттига доакъашхой, тӏема моттига ветеран Горчхананаькъан Салихан, СВО доакъашхой, «Тӏема моттигера вошал» яхача оагӏон хьалха латта Бохтаранаькъан Батыр. Филиала доазон тӏа массехк сахьата яхьашка ше-ше котвала гӏерташ бар къонабараш. Тоабашца бекъабенна, шоай мел йола говзал ураоттае хьежар уж», - йоах «Сердалога» «Даьхен лорабой» яхача ганза филиалера бенача хоамо.
Яхьашка дакъа лоацаш мел хиннача бера мерза совгӏаташ кийчдаьдар цу дийнахьа. Геттара чӏоагӏа белгалбаьннарашта деза совгӏаташ делар. Царна юкъе дар шоай дезалца пайдане ха дӏаяхьа аьттув луш дола кхетама хьал лакхду ловзараш а.
