«Велакъажар лу cовгӏата» яха дерригача дунен болам хьаллоацаш бола лораш белгалбир вай мехка
«Велакъажар лу совгӏата» яха халкъашта юкъера гӏо деш бола болам хьаллоацача лорашта мехкарча Паччахьалкхен грамоташ елар. Тов бетта 20-ча денгара 26-ча денга кхаччалца йолча хана, республикерча Берий клинически дарбанче унахой тӏаийбеш хилар из беркате тоаба. Цунна юкъе ба Россера, иштта кхыча мехкашкара юхь тӏара сакхаташ тоадеш бола цӏихеза лораш.
«Вай мехкадас Келаматанаькъан Махьмуд-ӏаьлас тӏадилла, лорашта совгӏаташ дӏаденнар мехкарча Паччахьалкхен вице-премьер Йовлой Мухьмад вар. Цо белгалдир, тахан цу наха шоашта дӏатӏаийцар лоархӏаме, хам баь варгвоаца декхар долга, доккха баркал аьлар цо дерригача къамангара берашта гӏо де ураэттача лорашта. Вай мехка кхаьча лораш чӏоагӏа раьза бар, мехкарча берий клинически дарбанче болх дӏабахьа кийчо яр лакхача боараме хиларах, цхьаккха новкъарле, кхоачамбоацар доацаш, гӏулакх чакхдаккха вӏаштӏехьдаларах. Вай мехкарча цу оагӏонцарча министерствон хьалха латтача ӏалбаканаькъан Зарас белгалдир, иштта бола болх дӏакхахьар лоархӏаме, доккха баркал кхайкаде дезаш долга», - «Сердалога» из хоам бера республикерча Паччахьалкхера.
«Велакъажар лу совгӏата» яхача проектага гӏолла, вӏалла мах бала ца безаш, берашта гӏо де аьттув ба. Федеральни дарбанче дӏабаха ца безаш шоаш бахача мехка из гӏулакх чакхдаккха аьттув балар доккха дика да.
Цул совгӏа, операци еш, цхьана болх дӏахьош, лакха говзал йолча, боккхача лорашкара дукха хӏама ӏомаду вай мехкарча дарбанчешка къахьегараша.
