Гӏалгӏай мехка хьалхара дӏахьош ба, Ерригроссийски суртанчий ара бу болх
Гӏалгӏайчено лаьрххӏа дӏакхайкадаьд ше российски суртанчашта лаьрхӏа йола центр хилар. Республике ший болх дӏаболабир хьалхарча Ерригроссийски исбахьален «Гӏалгӏайче - говзала доазув» яхача ара сурташ дахкара балхо. Из проект вӏашагӏъеллар я республикан Паччахьалкхен искусствай музей, иштта республикан культуран, туризма Министерство. Цар шоашта хьалхашка лаьрххӏа дола декхараш оттаду. Уж лаьрхӏа ба шоайла говзал эцара болх хьаллаца, мехкашта юкъера культурай бувзам лелабе, Гӏалгӏайчен тамашийна хоза моттигаш гойта.
ИЗО Паччахьалкхен музея зарбан болх лелабераша «Сердало» газетага ма аллара, из проект хӏара дийнахьа дӏахьош бола болх санна я, бакъда ший хьалхара гӏа цо гойт зӏамигача кепара. Из болх цар боккха боацаш дӏаболабар бахьан да, шоаш хьалаьца тема кӏоаргга дӏаяхьар, шоайла паргӏата хилар.
Хьалхарча балха даькъ тӏа дакъа лоацаш ба Россе йиъ моттигера начӏал дола говзанчаш. Цу тайпарча профессиональни цхьанкхетаро таро лургья Гӏалгӏайчен культура тайп-тайпарча оагӏонашкахьара го.
Из болх дӏабахьа лаьрхӏар Гӏалгӏайчен лоаме, цох суртанчаша шоаш аьннад - яьссача арен музей. Цар дукхагӏа терко тӏаозаш хургья историко-архитектурни Гӏалгӏай къаман тӏехьале. Лоаман аренашка латта къаьнара гӏалаш, сийдола малхара кашамаш, хоза аре, элгацаш, бусалба наха Даьла хьоахавеш хинна моттигаш цар балха юкъе керттера хургья.
Ара из болх дӏабахьарах, республикан музея ганзаш хьалйизарал совгӏа, из хургба боккха гойтам, цо таро лургья хьажархошта шоай бӏаргашца из го, иштта гӏалгӏай лаьттан бӏаьшерен истори укх заман суртанчашта мишта гу ха.
