Балхаш тIа дIатIаухаргбола къонабараш кийчбар тIадиллар мехкадас
НачIал, лакха говзал йола къонабараш балхаш тIа хьаийбе безаш хиларах дийцар вай Мехкадас телевидени гIолла бахархошца гуччахьара къамаьл деш, цар хаттарашта жоп луча юкъе. Мехка кулгалхочо белгалдир, тахан дешара, Iилман, IT, бизнеса оагIонашца хьалхалаттар къаьстта къона тIехье йолга.
«Доаккхал де мегаргдолаш болх ба тахан паччахьалкхен университете, IT–академе гIолла дIахьор. БIаьш кагирхой ба керда говзал караерзаеш къахьегаш. ТIадоагIача шера бIаьстан хана, 200 гаргга говзанча арахецаргва, хIаьта из юхьиг мара а яц.
Иштта йолча проектий никъ шера, бIаьха хила беза, хIана аьлча республика кхоане царга хьежжа хургья», - аьлар вай Мехкадас.
Келаматанаькъан Махьмуд-Iаьлас теркалдир, къонабараш тахан цхьацца хIама хьаллоацаш, доккхий лерхIамаш долаш хила безилга. Цунга хьежжа, балхаш тIа лакха говзал йола къонабараш хьаийбе безилга хьалхадаьккхар цо. «Болх бе волалуча хана, тохкама оагIонца деррига Iомадеш, шаьрдеш лелаш ха яьккха; тIаккха дIахо дIавахав со.
Аз дика кхетаду, доккхача гIулакхе кхача ловш вале, юххьанца мел дола хIама довзаш, шаьрдеш дIаваха везилга», - аьлар вай Мехкадас.
