Мехкада: Дезал - вахара керттера оагӀув
Дезала, безама, вӀаший тӀера хилара Ди дездеш бар берригача мехка. Моттигерча бахархошка къамаьл дир мехкадас Келаматанаькъан Махьмуд-Ӏаьлас, цу денна тӀатайжа. Кулгалхочо белгалдир, дезал хӀара сага вахаре эггара лоархӀамегӀа бола, къаман беркате Ӏадаташ, оамалаш лораю оагӀув болга. Къаьстта вай мехка массахана лакхерча моттиге лаьттад дезала гӀулакх.
«Вай хьаькъалеча даьша тӀадиллад вайна; дезала юкъера барт, безам, цхьоагӀо, вӀаший лерхӀам болаш дахар, бераш бусалба дин лоархӀаш, къаман Ӏадаташ лорадеш кхедар. Боккха дезалаш тахан мехка хилар доаккхал де дезаш хӀама да. ГӀалгӀай къамо тхьовра денз хьабахьа беркате никъ ба из», - белгалдир мехкадас.
Республикан кулгалхочо доккха баркал кхайкадир Россе Президента Путин Владимира, цо хьалаьцача политиках, дезала юкъера моттиг тоаяр хьаллоацаш, гӀо деш хиларах. Президента соцам баь, доладаь да тайп-тайпарча оагӀонашца гӀо дар, масала, ноаной капитал, маьха чухьнахьа ипотека, берашта хӀара бетта телаш дола ахча.
«ХӀара цӀагӀа массахана барт, безам, ираз хилда, могаш-маьрша долаш, цхьаккха цатом боацаш кхувлда вай бераш! ХӀара денна дезала юкъера моттиг кхы а дикагӀа тоалуш, беркат долаш дахалда шо!» - белгалдир мехкадас.
