Тӏехьарча бетташка энергетикаша зийра Наьсарен-Шахьара даькъ тӀа, цӀаьхха, дукхагӀа ток дӀаозаш хилар: балха тоабо массаза ше беш бола болх дӀабихьар, цу даькъ тӀара хьал тохкаш.

Ардара бетта 30-ча дийнахьа, Наьсарен даькъ тӀа шахьара электросетей къахьегамхоша, иштта ГӏалгӀай Республике гӀолла йолча МВД къоал дара духьаларча, экономически кхерамзлен Урхаллено цхьана дӀахьош хиннача балха гучадаьлар, бокъонах доацаш оахкалаш доахача фермо ток дӀаозаш хилар. Хьулаяь дӀаоттаяь хиннай таьрахьашца ахча даккхара йола аппараташ. Къаьнара, башха сага зувргйоацаш йола гӀишло, тата хьахозаргдоацаш тоаяь яр. Таьрахьашца ахча Ӏоадеш бола гӀирс токаца болх беш хиннаб.

Цул совгӀа, хьалхагӀа цига 160 кВА трансформатор оттабаьбар, 145 киловатт-сахьат низ болаш.

Бокъонаш телхаеш болча цу наха, шоашкара хийцар 630 кВА низ бола тока гӀирс. Шоай моттиг, аьшка карт а яь, дӀакъайлаяьккхар.

Энергетикаша, учёте а йоацаш ток дӀаозаш хиларах, лоткъам оттабир. ДӀаэзача тока мах ба 8,8 млн киловатт-сахьат. Из цхьан шера ерригача Жӏайрахьа кхалено дӀаозар миссел ток я. Компанена хулаш дола зе 85 млн сом да- цу ахчах боагӀа 600 километр тӀеххьарча ханара 6-10кВ тока саьрг.

Къоал даь хиларах бола хоам говзанчаша дӀабахьийта кийчбаьб республикан бокъонаш лораеча моттиге.

«Ингушэнерго» болхлой лохаш ба бокъонах йоацаш ток дӀаозаш йола моттигаш, оахкалашца къахьега фермаш. Йоагаеш хиннача токах дола ахча, цу юкъе таьрахьий рузкъа даккхарга дӀадодар а долаш, дукхагӀчар, шоашта зе хургдоацаш, цу тайпара бокъонаш телхаеш лечкъаду.

«Цудухьа из Ӏаткъаш хул токаца Ӏалашо яра, хӀана аьлча тока саьргашта, трансформаторашта тӀабуж боккха мухь. Цул совгӀа, йоагаеча электорэнергех бола мах хьалуш а хилац. Къаьстта из бахьан долаш, иштта йоккха терко лоаттаю оаха цу даькъ тӀа», - аьлар «Ингушэнерго» филиала кулгалхочун декхараш кхоачашдеш волча Бӏарахой Рашида.

Белгалду, «Къилбаседа Кавказа россетий» говзанчаша массайолча моттигашка чӀоагӀа тӀахьожам лоаттабу, токах наха къайлагӀа пайда ийбергбоацаш. Арабаьле болх бу шо - шоай доакъош тӀа счётчикий хьал довзаш, прибораш дӀаоттаеш, бокъонах йоагӀачул дукхагӀа ток дӀаозаш йола моттигаш йий хьожаш, иштта наха из хьал ма дарра дӀадовзийташ болх дӀахьу, электроэнерги лочкъаеш моттиг нийслой, цох хӀаравар бехктокхаме отташ хилар хьалхадоаккх.