«Хьунаш меттаоттаеш болча балха тӀа, вай мехко хӀара шера дика толамаш доах. Иштта дӀахьоча къахьегамца аьттув боал хьун беркат лораде, мехка президента тӀадехка лоархӀамедараш кхоачашде. Хьу вайна Дала денна хам баь варгвоаца беркат да, цун хьал лорадаро дукха дикаш доаржадергда», - белгалдир вай мехкадас Келаматанаькъан Махьмуд-Ӏаьлас. «Лорае хьунаш» яхача федеральни программага гӀолла Шолжа кхален гувнашка 13 эзар совгӀа га дӀаегӀар. БӀаьстан балхаш долалуча хана, дӀабихьар из болх.

Из ха эггара дикагӀа лоархӀ гаьнаш дӀалатара, лаьттанца чӀоагӀъялара. Цу оагӀон балхацарча министерство, лаьттан хьал эшача хӀаманца тоадеш, болх дӀабихьар 135 гектар йолча доазон тӀа. «Лорае хьунаш» яхача федеральни, «Экологи» яхача къаман проекташка гӀолла, шоаш Ӏалашъяь хьун гӀулакха лелаеш йола машенаш араяьха, дӀабихьар из боккха болх. 90% кхоачаш, мел эша хӀама Ӏалашде аьттув баьлар хьунаш цӀерах лораеча моттигашка.

ДӀабихьача тохкама балхага хьежача, хьун беркат толхадеш, гаьнашта зе деш мел долча хӀамаех хьун доазош лораде аьттув баьннаб вай укх тӀехьарча пхе шера, Даьла къахетамца. Ӏалам лорадарах йолча кхетаченашка бахархой цу гӀулакха тӀахьехаш, 2019-ча шера денз, къаман проекташка дакъа лоацаш хьабоагӀа вай мохк. Цу юкъе ба «Дагалоаттама беш» яха къамашта юкъера болам, «Лорае хьу» яха ерригача Россе хьунаш меттаоттаеш бола болам. 10 эзар совгӀа болча вай бахархоша, из беркате гӀулакх хьаллоацаш, къона гаьнаш дӀаегӀай мехка.

Цу юкъе ба Даьла духьа гӀо деш лелараш, дешархой, студенташ, хьакимаш. Иштта цхьана дӀахьоча балхо вай хьун хьал дикка тоадергда, Ӏалама кхоачам лорабергба. Мехкара Ӏалама гӀулакх хӀара денна дикагӀча хьале дерзадара тӀехьа къахьегаш хила деза вай дерригаш, хӀана аьлча вайна массанена, кхувш латтача тӀехьен духьа, кхоачашде дезаш хьалхашка латта декхар да из.