Аьттув хилар
«Фермерий ишколе» шоай балха говзал лакхъергья кхоана хургволча 30 ахархочо
Россельхозбанка, Юртбоахама гӀулакхех йолча министерствос, гӀалгӀай паччахьалкхен университета цхьана вӀашагӀъелла «Фермерий ишкол» я вай мехка, ший болх дӀаболабеш. «Зоотехни», «Агрономи» яхача оагӀошцара кхетам лакхбеш, дешаргда кхоана хургволча 30 фермера. Дешар чакхдаккхарах дола дипломаш хьаэцаш, 2,5-3 бетта цу балхах болча кхелахошта шоай бизнес - лаьрхӀараш гойта деза цар. Къахьега болалуш болча фермерашта боккха аьттув луш, шоай гӀулакх дӀадоладеш ха мел дезар Ӏомадеш я «Фермерий ишкол». Юртбоахаме болх бе, нийса доал де мел эшар довзаргда доакъашхошта. Иштта таханарча хана хьадаржаш латта цу мугӀарера кердадараш Ӏомадергда цар.
«Проекта керттера, лоархӀаме декхар - дӀаболалуш болча фермерашта шоай гӀулакх хьаделла, тхьовра денз хьа цу оагӀонца болх берашта шоай бизнес дикка йоаржае гӀо дар. Каст-кастта нийслуш хул, геттара чӀоагӀа къахьега, ший хӀама доаржаде ловш волча сага цу оагӀонцара говзал, кхетам ца тоъаш, дуккхадараш ца довзаш», - дийцар Ставрополерча Россельхозбанка филиала кулгал деча Сенокосов Алексейс. «Фермерий ишкол» яхача проекто, кхетам бенна ца Ӏеш, боккха аьттув лу студенташта.
Шоаш мел Ӏомадаьр йоккхача, лоархӀамеча моттигашка ха дӀахьош, дӀачӀоагӀде йиш хургья цар. «Фермерий боахама боаггӀача боараме доал де, юртбоахамера гӀулакхаш дика довзаш хила веза саг. 250 сахьата лаьрхӀа йолча кхетам лакхбеча онлайн-программо шоай проекташ йоаржае аьттув лу царна», - белгалдир университета ректор йолча Ӏалбаканаькъан Фатимас.
«2020-ча шера денз, хьайоагӀача «Фермерий ишколо» Россерча 6500 совгӀа болча бахархошта юртбоахаме бизнес дӀайолае гӀо даьд. РФ 15 керда моттигаш йолаш, 50 доазонаш да проекте дакъа лоацаш. Цо хьагойт, из мел эшаш, боккха, лоархӀаме болх ба тахан.
